Katy Perry nena kan inlaichinna hian chona lian tak min pe : Orlando Bloom

Orlando Bloom chuan a nupui hual Katy Perry nena an inlaichinna chuan chona lian tak a pek thu sawiin, an pahnih inkarah inhriatthiam lohna a awm lohnan tihtur tam tak a neih thu a tarlang.

"Pool hrang hlakah kan cheng a, a pool hi hriatthiam loh chang ka ngah rualin ka pool pawh hriatthiam loh chang a neih ve tho ka ring. A chang hi chuan chona lian tak tak hi hmachhawn a ngai ve ṭhin a ni," tiin kum 46 mi English actor chuan a sawi.

Bloom chuan an inkara tawrh hrehawm a tih ber ṭhin chu an hnathawhna avanga hmun hla taka an awmbo ṭhin chu a nih thu a sawi. “Pirates of the Caribbean” star leh kum 38 mi, Perry-te hi January 2016 aṭangin an inzui ṭan a, mahse March 2017 khan an inkar hi inhriatthiamna sang tak nen an tihtawp thu an puang. An inṭhen hlimah "American Idol' judge Perry chuan intihhlum duhna thinlung hial a neih hman thu a sawilang. February 2018 a rawn inherchhuah leh meuh chuan an inkar hi a ṭha leh tawh hle. Kum 2019 Valentines Day khan an inhual thu an puang zui leh a ni.

March 2020 khan "Teenage Dream" singer chuan an inkara an fa hmasa ber tur a pai thu sawiin, August 2020 khan an fa hmasa ber an neih thu hi an puang zui a ni. Perry leh Bloom-te hian Japan-ah summer wedding nei turin ruahmanna thui tak kalpui tawh mah se, Covid-19 hripui leng vangin an ṭhulh leh a ni.

March 2021 khan a rukin an innei tia thuthang darh chu thudik lo a nih thu an tarlang a, vawiin thleng hian an la innei lo a ni.