Scoob! an tlangzarh

Scooby-Doo film thar ber, computer-animated film Scoob! chu Zirtawpni liam ta khan 'video on demand' kaltlangin an tlangzarh.

Ruahmanna hmasaah chuan May 15-ah vek khan theatre-a en theih tura tlangzarh tum a ni a, mah­se coronavirus vangin khawvel hmun hrang hrangah puipunna reng reng khap a ni ta si a, digital lam an hawi ta a ni.

Scoob! hi Warner Ani­mation Group bawkin an produce a, Tony Cervone chu director niin kum 2014 aṭang khan hma an la ṭan tawh a, Zirtawpni khan an tlangzarh thei chauh thung.

Scooby-Doo film hi live action leh animation-in eng emaw zat tihchhuah a ni tawh a, series pawhin tihchhuah a ni bawk. 

Tunhma deuha Cartoon Network-a tihchhuah ṭhin  Scooby-Doo, Where Are You! kha kum 1969-a siam a ni a, Joe Ruby leh Ken Spears-te siam niin series eng emaw zat tihchhuah a ni tawh. A series thar ber Scooby-Doo and Guess Who? chu nikum khan Boomerang-ah an tichhuak. Kum 2013 khan  TV Guide chuan TV Cartoon ṭha ber pangnaah Scooby-Doo hi a puang a ni.