Chhiatna karah hlimna thar

Turkey leh Syria rama lirnghing rapthlak tak thleng vangin mi 46,000 chuangin nunna an chan tawh a, a ni telin thi zat hi an punbelh zel bawk. Lirnghing vangin Turkey-a chenna in 2,64,000 chuang chu tluchhe tawhin, chhanchhuah hna thawktute tan pawh hnathawh a harsa tawh hle.

Mahse heng hun harsa tak karah midang nunna chhanhim tuma huaisen taka chechhuak hmuh tur awm ṭhinte chuan social media lamah hnuhma duhawm tak a hnutchhiah thung.

Kar hmasa khan Mardin Fire Department-a mi chuan in chim kara zawhte tang chu chhanchhuakin he zawhte hian a chhanchhuaktu chu hre ranin hmun dang pan a tum ta hauh lo.

He chanchin hi Ukraine Minister of Internal Affairs advisor Anton Gerashchenko chuan tarlangin, zawhte leh a chhanchhuaktupa thlalak chu a rawn pholang a, social media lamah mipui ngaihven a hlawh nghal hle. "A chhanchhuaktu hi Ali Cakas a ni a, a zawhte chhanchhuah hmingah Enkaz (rubble) phuahin a enkawl zui nghal a ni. Hlim takin awm chhunzawm zel rawh se," a ti. He thu a tarlan aṭang hian view maktaduai ruk dawn nei tawhin, like nuai hnih dawn a nei tawh bawk.