Michael Angelo Batio leh Chris Adler an thawk dun
Shred king Michael Angelo Batio chuan album thar 'More Machine Than Man' a tlangzarh dawn a, hetah hian Lamb of God drummer hlui Chris Adler pawhin music track pakhatah a pui.
Guitar perhna atana a kut ding lam leh vei lam hmang thiam, Mizoram pawh rawn tlawh tawhtu guitarist turu Michael Angelo Batio hian a album thar tura mi 'The Badlands' music video chu thlir theih turin a chhawp chhuak a, he music-ah hian Chris Adler chuan a pui a ni. Adler hian Lamb of God a chhuahsan hnua music record tlangzarha a kuthnu a telh lehna hmasa ber a ni bawk.
'More Machine Than Man' hi kum 2013-a 'Intermezzo' a tlangzarh hnua studio album a tihchhuah leh hmasak ber tur a ni a, June 12 hian RatPak Records kaltlangin a tlangzarh dawn a ni. Track 13 a awm dawn a, Michael Angelo Batio fan-te tan chuan a nghahhlehawm tawh hle ngei ang.
Chris Adler hi Lamb of God dintu zinga mi a ni a, kum 1994-a din a nih aṭanga nikum thleng khan LoG-ah hian a tel a ni. Kum 2015-17 inkarah khan Megadeth a pui ṭhin bawk.