'Oops!...I Did It Again' Album-in kum 20 a tling ta

Britney Spears studio album pahnihna 'Oops!...I Did It Again' tlangzarh aṭangin kum 20 a liam ta a, hemi lawmna pual hian Britney Spears chuan instagram-ah video hlui dahkhawm mi siam a hmuh chu a post.

'Oops!...I Did It Again' hi May 16, 2000 khan tlangzarh a ni a, a hunlai khan a lar rem rem hle a, US Billboard 200-ah tlangzarh a nih karah No.1 ni nghalin copy 1,319,000 lai a hralh nghal. Kum eng emaw zat chhung chu hmeichhe artist, tlangzarh kara album hralh tam ber record a luah nghe nghe a, kum 15 a liam hnuah Adele chuan he record hi a rawn khum chauh a ni.

Ram 15 chart-ah 'Oops!...I Did It Again' hi No.1 a ni thei a, khawvel hmun hrang hrangah copy makatduai 20 chuang a hralh. He album-a hlate hi a lar hlawm hle a, single-a a tihchhuah 'Oops!...I Did It Again', 'Lucky', 'Stronger' leh 'Don't Let Me Be the Last to Know'-te chu a hunlaiin a 'hit' em em vek bawk.

Britney Spears hian a video post caption-ah hian a video siamtu chu tupawh nise lawmthu a hrilh thu sawiin, a beisei lo lutuk chuan a phone a thlauh hial ṭep niin a sawi.

Kum 1999-ah khan 'Baby One More Time' hmangin Britney hian khawvel a deng chhuak a, a hunlai khan ani aia lar hi an awm bik chuang awm lo e. Hla leh album a tihchhuah thar apiang khan ngaihven a hlawm em em zel a, mahse kum 2006 chho aṭang khan a talbuai ṭan a, studio album erawh pakua lai a tichhuak a ni.