Khiangte Construction Ṭhazual Gospel; Arini'n "Sual hnehna" nen chart chung berah ro a rel

Khiangte Construction Ṭhazual Gospel chart tihchhuah tharah Synfo buatsaih Praise On 2016-a pakhatna R. Lalrinmawii (Arini) hla thar ber, "Sual Hnehna" chuan chart chung ber a rawn luah ta.

Giants Fall

He hla mawi tak hi "Giants Fall" hla lehlin a ni a, thiam taka letlingtu hi kan Mizo Gospel singer neih ṭhat Amtea lehlin niin, music lama sulhnu ngah Lal K Sailo chuan rimawi hi buaipui sakin, recording hi HC Recording-ah tih a ni thung. Arini zaithiam zia sawi nawn a ngai lo a, a thawhpuite hming kan tarlan aṭang ringawt pawh hian chart chung ber a rawn luah hi a mak hran lo.

Lalthangsangi leh Becki

"Heiden rial" hla aṭanga a aw kan ngainat rawn, Lalthansangi'n thiam taka a sak "A ram chu ramhlun a ni" chuan hma rawn sawn zelin, pariatna aṭangin pahnihna a rawn hauh tawh a, chart chung ber thleng thei turin dinhmun ṭha takah a ding mek. Chart hmasa lama pakuana Becky Fanai pawhin hma rawn sawn zelin, a hla thar ber "Lalpa a beidawng lo" chu a sang pathum zingah rawn lang phak tawh a ni.

Chart-ah hmel thar

Chart hmasa lama kan hmuh loh Mama Khiangte, Lalnuntluangi, Maruati, Amosa Vocal Point leh Rebecca Fanai-te an rawn lang thar a, Tuikual North Br KTP Band-i'n thiam taka an sak "Thlamuantu" chu 10-na aṭangin palinaah a rawn inhlangkai a, Mama Khiangte "Lalpa ka lungpui" chu pangana a ni.