Skrillex-in darkar 24 chhungin LP leh album puitling tichhuak

American DJ leh record producer, Skrillex (Sonny Moore) chuan LP “Quest for Fire” a tihchhuah aṭanga darkar 24 ral hmain album thar “Don’t Get Too Close” chu a tichhuak leh. Album-ah hian artist ṭha rual Yung Lean, Bladee, Chief Keef, Justin Bieber, PinkPantheress, Trippie Redd, Bibi Bourelly, Kid Cudi bakah midang ṭhahnem takte a thawhpui bawk a ni.

Skrillex hian Fred Again leh Four Tet Madison Square Garden-ah performance ropui tak an neih laiin a puang deuh thut a, fans-te pawh a barakhaih hle. Press release tarlan danin, album bootleg CD chu event-ah hian semchhuah niin, heng CD-te hi zawrhchhawn tura siam a ni lo thung.

Skrillex hi rimawi khawvelah thawm liantham nei loa hun rei tak a tal hnuah, kumin chho chu a rawn tal na hle. January thla khan Fred Again leh Flowdan-te nena an thawhdunna "Rumble" chu a lo tichhuak tawh bawk a, a hnuah single “Don’t Get Too Close,”, “Way Back”, leh “Real Spring,” te a tichhuak leh a ni.

Hei bakah hian hla 15 awmna LP “Quest for Fire” chu February 17 khan a tlangzarh a, hetah hian A-list artist Missy Elliott, Swae Lee, Pete Wentz leh midangte a thawhpui a ni. “Don’t Get Too Close” hi kum 2014-a "Recess" a tihchhuah hnua album puitling a tihchhuah leh vawi khatna a ni.