Femina Miss India 2023-a Mizoram aiawh tur Zuali Chhangte

Femina Miss India 2023 vawi 59-naa Mizoram aiawh turin Miss Mizoram 2020-a top 6 C. Lalhmangaihzuali (Zuali Chhangte) chu thlan a ni. India ram State/UT 30 aiawh Finalist 30-te chuan lallukhum hi an inchuh dawn a ni.

Covid-19 hripui leng vanga 'online' hmanga kalpui a nih hnuah, Femina Miss India Grand Finale hi April thlaah (a date la tarlan loh) Manipur khawpui Imphal-ah nghah a ni dawn a, hmarchhak state zingah a thleng thei hmasa ber an ni nghal bawk dawn a ni.

Zuali hian March 5-ah Miss India camp zawm turin Mumbai a pan dawn a, grooming session heng –workshop, photo shoot, award night, sub-title competition, interview leh tehfung hrang hranga inelna an neih hnuah, organization social media account kaltlanga top 20, 12, leh top 5 an puan hnuah, April thlaah lallukhum khum tur hi puan a ni ang.

Zuali chuan inelna hautak a hmachhawn tur chungchang sawiin, "Pathian hnenah lawmthu ka sawi a, ka chhungte leh, kawng engkima min buaipuitu Miss Mizoram Organisation chungah thinlung takin lawmthu ka sawi a. Stage fright nei ṭhin ka ni a, inelna hautak tak ka hmachhawn tur ka nih bawk avangin Pathian awmpuina ka mamawh hle a ni. Hriselna ṭha ka neih theihnan Mizoram mipuite in mi ṭawngṭaipuina ka rawn dil tak meuh meuh a ni," tiin Vanglaini a hrilh.