Elon Musk-a'n India rama Twitter Office 3 zinga 2 a khar; Thawktute in aṭanga hnathawk turin a chah

Khawvela pa hausa ber pahnihna dinhmun hauh mektu, Elon Musk chuan India ramah a company Twitter Office pathum zinga pahnih, New Delhi leh Mumbai a mite chu a khartir a, a hnathawkte chu in lam aṭanga thawk turin a chah zui bawk. Musk hian social media service tluchhe mek khaidin lehna tur, an senso hautak zualte phuhruk tuma a hmalakna chi khat niin an ngai.

Twitter hian nikum kumtawp lam thleng khan an company-a hnathawk mi 200 chuang zinga 90% chuangte chu a lo bantir tawh a, tunah political center New Delhi leh financial hub Mumbai-te chu a khartir leh tak avangin Bengaluru-ah chauh office pangngai hi an hawng tawh a ni.

Musk hian kum 2023 ral hmaa Twitter a tlakchhiat lohna tur leh, a sum lakluhte a ziaawm chhoh theihnan khawvel puma a hnathawkte chu banin office eng emaw zat a lo khartir tawh a ni. US tech giant Meta Platforms Inc. leh Google Alphabet Inc.-te chuan khawvel internet arena ṭhan chak berna, India ramah hian an huang zauh tuma theihtawp an chhuah mek laiin, Musk erawh chuan Indian market hi hna hmasaah a dah mai rih lo niin an sawi.