Khawvela trillionaire hmasa ber tur Jeff Bezos?!
Comparisun-in zirchianna a neih a tihchhuah ‘The Trillion Dollar Club’-ah chuan khawvela mi hausa ber ni mek. Amazon CEO Jeff Bezos chu khawvel pian hnua trillionaire hmasa ber ni thei dinhmunah a ding niin an tarlang.
Jeff Bezos hi kum 56 chiah a la ni a, Forbes-in a hausak zawng a chhut dan chuan a hausak zawng hi $tluklehdingawn 142.8 hu a ni.
Zirchianna aṭanga a lan dan chuan Bezos hi kum 2026-ah hi chuan trillionaire a nih tawh hmel a, kum ruk a liam meuh chuan $tld 1,000 a nei tawh dawn niin an chhut, chutih hunah chuan kum 62 mi a ni ve tawh ang.
Bezos hian a nupui nen an inṭhen khan $tld 38 a hloh a, chutichung chuan khawvela mi hausa ber a la ni reng tho a; kum nga liam ta chhung khan a hausakna hi 34%-in a pung a ni. Hemi anga a hausakna hi a pung chho zel a nih chuan kum 2026-ah chuan khawvela trillionaire hmasa ber a ni dawn.
Trillionaire naupang ber tur Mark Zukerberg?
Facebook founder Mark Zuckerberg chu kum 51 vel a nih hunah chuan trillionaire a nih theih beisei a ni bawk. Tunah hian kum 36 chiah a la ni a, mahse a hausakna punna hi tun ang renga a kal a nih chuan kum 51 a nih hunah chuan trillionaire hi a nih theih zirchiangtute chuan an ring a, an chhut ang hian thil a kal a nih chuan trillionaire ni thei naupang ber a ni dawn tho a ni.
Trillionaire ni thei tur dangte
Evergrande head Xu Jiayin, Alibaba co-founder Jack Ma, leh Reliance Industries’ (RIL) chairman Mukesh Ambani-te pawh trillionaire la ni thuai tura rin an ni. Ambani hi kum 2033-ah chuan trillionaire a nih hman rin a ni a, chutih hunah chuan kum 75 a ni tawh ang.
Xu Jiayin hi kum 2027-ah chuan trillionaire a nih hman beisei a ni a, Jack Ma hi kum 2030-ah a nih hman an ring ve bawk a, chutih hunah chuan kum 65 a ni tawh ang.
Comparisun hian mi 25 hausak dan leh an hausakna kumtina a pun dan an zirchiang a, heng an zirchian zinga 11 chiah hian trillionaire nih theihna chance an nei niin an ngai.