Jisoo-i'n Blackpink video zinga senso hautak ber tur buaipui mek

Blackpink member, Jisoo chuan hla thar a tichhuak hnai a, tunah hian music video buapuiin hun a hmang mek.

YG Entertainment chuan nimin khan thuchhuah siamin, "Jisoo-i solo music thar tur hi khuahkhirhna khauh tak hnuaiah ram dangah siam mek a ni. Blackpink video zinga production senso hautak ber tur a nih avangin nghah man a awm hle ang," an ti.

Kum 28 mi, Jisoo hi world tour an neih mek lai ni mah se, a fans te laka a lo intiamna chu tihhlawhtlin tumin rim takin; a hun awl neih ang angah MV thar buaipui hian hun a hmang a ni, a ti.

BP enkawltu, YG chuan music video hi Jisoo chawilarna kawng khat atan shooting hi ram hrang hrangah neih pui an tum thu leh, solo artist ṭha tak anga hmelthar pek an tum tih an tarlang.

Blackpink hian album thar an tihchhuah emaw mimala solo project an neih apiangin record thar an siam ziah emaw tih mai tur a ni. Jisoo hi BP member zinga solo project tichhuak hnuhnung ber tur a nih avangin a lakah pawh beiseina sang tak an neih thu an sawi.

Hetih lai hian, Blackpink chuan K-pop girl group zinga world tour lian ber 'BLACKPINK WORLD TOUR [BORN PINK]' an kalpui mek a, mi maktaduai chuangin he hun hi an chhim tawh a, chhimtu hi an pun chhoh zel pawh a rinawm hle.