Dadasaheb Phalke International Film Festival Awards-ah "The Kashmir Files" a langsar ber; 'RRR'-i'n Film of the Year dawng

Indian cinema huanga chawimawina sang leh ngaihhlut ber, Dadasaheb Phalke International Film Festival Award chu Thawhṭanni zan khan Mumbai-ah semchhua a ni. Kum 1990 chhoa Kashmiri Hindu-te'n tihduhdahna an tawrh dan leh, Muslim-te laka zalenna an sual dan chanchin hawi tarlanna "The Kashmir Files" chu he zana film langsar ber niin, award ngaihhlut Best Film award leh, he film hlawhtlinna phena mi pawimawh, Anupam Kerr hnenah "Most Versatile Actor of the Year" hlan a ni.

Fak leh selna karah

March 11, 2022-a tlangzarh, 'The Kashmir Files' hian India rama rorelna fawng vuantu Bharatiya Janata Party (BJP) thlawp a hlawh em avang leh, an chhiah chawi tur eng emaw zat an ngaihhnathiam zui bawk vangin sum pawh a hailut hnem hle a, khawvel pumah Rs vbc 340 chuang hailut tawhin, kum liam ta chhunga Hindi film sum lalut tam lamah pathumna a ni. Hetih lai hian, BJP-i'n India khua leh tui tawh phawt chu he film hi en vek tura a tih chu a hunlaia inhnialna chawk chhuaktu lian tak pakhat ni zuiin, BJP sorkarna sawhnghehna atana hmanrua pawimawh taka hman tumah ngaiin ṭhenkhatin an sawisel thung.

Alia leh Ranbir tan

zan chhinchhiah tlak

Alia Bhatt chuan "Gangubai Kathiawadi" film vangin Best Actress a dawng a, hei mai a ni lo; a pasal Ranbir Kapoor chuan "Brahmastra" vangin "Best Actor" chawimawina a hum haw bawk a, an nupa tan zan chhinchhiah tlak a ni.

Khawthlang ram lama tla na tak SS Rajamouli-a kutchhuak, ṭhian pahnihin British sorkar laia an chhungkua leh hnam chhan tuma hmelma an beihna film hmuhnawm tak, 'RRR' chu kum liam ta chhunga film hmuhnawm ber 'Film of the Year"-ah thlan a ni bawk.