Pathaan-in vaibelchhe 1000 lalut tawh!

Shah Rukh Khan channa Pathaan-in Bollywood khawvelah ro a rel chhunzawm zel a, February 21 thlenga a sum lakluh zat chu vaibelchhe 1000 a tling tawh - Indian movie zinga vaibelchhe 1000 lalut thei pangana a ni.

Pathaan hma hian Dangal (Rs 1968.03 cr), Baahubali 2: The Conclusion (Rs 1747 cr), KGF: Chapter 2 (Rs 1188 cr) leh RRR (Rs 1174 cr) te chuan vaibelchhe 1000 an lo lalut tling tawh a, Pathaan danglamna erawh Bollywood sum lakluhna langsar tak pakhat China-ah film dang ang hian release a la ni ve lo a, China-a release tel miah loa vaibelchhe 1000 an lalut thei hi a ropui hle.

January 25-a tlangzarh Pathaan hian tlangzarh a nih aṭangin record a siam nual - release a nih aṭanga a ni hnihna lekah cheng vaibelchhe 100 a lalut nghal a, ni li chhung lekah vaibelchhe 200 lalut zuiin, ni sarih chhungin vaibelchhe 300 a lalut hman bawk.

Vaibelchhe 400 lalut tur pawhin ni 12 bak a mamawh lo a, ni 28 lekah vaibelchhe 500 ngawt a lalut. An chhut dan hnuhnung berah chuan Pathaan hian India ram chhungah vaibelchhe 623 lalutin, ram pawn aṭangin vaibelchhe 377 a lalut thei - a lakluh zawng zawng hi vaibelchhe 1003 tling tawhin, KGF: Chapter 2 (Rs 1188 cr) leh RRR (Rs 1174 cr) khuma vaibelchhe 1200 chu a lakluh ngei a rinawm ta hle.

Yash Raj Films hnuaia spy thriller film Pathaan-ah hian SRK bakah John Abraham leh Deepika Padukone te chu star langsar an ni a, Siddharth Anand chuan a direct thung a ni.

YRF hian Pathaan hmain spy thriller film, Salman Khan leh Katrina Kaif channa Ek Tha Tiger (2012), Ali Abbas Zafar-a direct Tiger Zinda Hai (2017) leh Hrithik Roshan channa War (2019) te an lo tichhuak tawh bawk a, box office lamah an hlawhtlinpui viau zel.

Pathaan star SRK chuan, "Pathaan entu mipui leh min thlawptu media te, he film hlawhtlinna dal theitu tam tak kara min thlawp avangin, in chungah kan lawm em em a ni," tiin lawmthu a lo sawi tawh.

Tun hnaiah social media lamah bollywood duh lohna a ri ring ṭhin hle a, Pathaan pawh hi #BoycottPathaan tiin social media lamah beih a tawk nasa hle - heti chung hian a hlawhtlinna kawng erawh dâl theih a ni lo.

Kum li zet Bollywood-a a hmel hmuh tur a awm tawh loh hnua lo kir Shah Rukh Khan hian kuminah film tihchhuah hmabak a la nei a, June 2-ah Jawan chu tlangzarh tura ruahman niin, Dunki chu December 22-a tlangzarh turin ruahmanna kalpui a ni bawk.