Zaii'n hmangaihna a haw tak tak lo!

Zaii Hauchhum chuan tun hnaiah 'Hmangaihna ka hua' tih hla a rawn larpui a, a zaithiamna piah lamah a chêt dan hmangin a hla thu a rawn pho chhuak hneh hle.

A chet dan thlirin hmangaihna a haw tak tak niin a lang a, mahse Zaii chuan, "Hmangaihna te chu haw tak tak lo e. Tunah rih chuan...," tiin Vanglaini a hrilh.

Hmangaihna ka hua tih hi Mizo music producer leh hla phuah thiam Rpa Ralte phuah a ni a, thla li liam ta khan YouTube channel-ah dahchhuah niin entu mi maktaduai hnih an awm tawh.

Zaii chuan, "Music video siam nan sum kan hmang tam lo a, beisei phak bakin mipuiin an lo chîk. Ka pholan tum angte mipuiin an lo hrethiam a, ka lawm hle," tiin a sawi.

Hmangaihna ka hua 'parody' chu Mizo comedian lar Mapuia chuan a siam a, FTH Official-ah 'I Hmangaihna Ka Hak - James Ṭiauchhum' tiin chu dah chhuak ve bawkin, he thu ziah la thleng khan entu nuai 2.44 an awm tawh a ni.

Zaii chuan, "U Mapuia talent hi chu ka fak thlawt. A hla thu ṭan nan khan 'Kawla ni chhuak chhiarin' tih kha a rawn hmang a, ka hla hmasa ber 'Nghilh har di hmasa' hla thua mi kha a ni. Hmangaihna ka hua nena inzawm si lo khan keimah kha a kâwk ngawih ngawih a, thil hi a man thiam a ni," tiin Mapuia a fak hle.

Zaithiamah hian vocalist an awm a, artist an awm leh bawk. Zaii hi artist tih theih zinga mi an ni a, stage velah zei viau mah se a zám ve ṭhin hle. Zaii chuan, "Backstage-a ka awm lai hian stage a lian emaw a te pawh ni se ka zám ṭhin hle. Mahse stage ka luh a, music a rawn rik tawh hi chuan ka rilru zawng zawng ka pek avangin ka tih tur ang ka tichhuak ngei ngei ṭhin," tiin Mizo zaithiam stage performer ṭha ber zinga mi chuan a zâm ve ṭhin thu Vanglaini a hrilh a ni.