2023-a tlangzarh kara USD mtd 100 lalut hmasa ber Ant-Man 3

Marvel comics behchhana siam, Ant Man film pathumna "Ant-Man and the Wasp: Quantumania" chu a screenplay leh thawhthu kalhmang fuh tawk lo tia critics te'n an duh khawp lohna sawi mah se, mi tam tak rin leh beisei lawk aiin a che ṭha hle a, kar liamta chhung khan North America box office-ah USD maktaduai 104 chuang zet a lalut a; khawvel huapah USD mtd 300 dawn lalut tawhin; a chungnung fal hle.

Rating sang lo; dah hniam theih loh

Ant-man trilogy zingah sum lalut hnem ber ni nghal bawkin, kumina film chhuak tawh zingah tlangzarh kara USD mtd 100 chuang hailut thei hmasa ber a ni bawk. "Ant-Man 3" hian Rotten tomatoes-ah review 301 aṭangin 5.6/10 a hmu a, CinemaScore-ah "B" a hmu pha ṭâwk a ni.

Ant-Man hi Marvel series zinga an chhuanvawr leh dah chungnung pawl a ni ngai lo a. A film kalhmangin sawi leh sel tawk mah se, a changtute Paul Rudd leh Evangeline Lilly chezia erawh fak a hlawh hle.

Avatar-i'n Titanic a lehpel!!!

Avatar chhunzawmna, "Avatar: The Way of Water" chu pahnihnaah a la inhamtang a, kar liamta vék khan 1997 romantic film 'Titanic' chu lehpelin, khawvel huapa sum lalut tam pathumnaah a inhlangkai a, a sum lakluh belhkhawm hi USD tld 2.2433 chuang a tling tawh!

Kar hmasaa pakhatna "Magic Mike 3" chuan lamtual chung ber a chelh thei ta bik lo a, pathumnaah a tla thla a ni.