Nipsey Hussle thattu kum 60 chhung lungin tang turin hrem

March 2019-a American rapper, Nipsey Hussle silaia kaphlumtu Eric Holder chu kum 60 chhung lungin tang tura hrem a ni.

Los Angeles County Superior Court Judge H. Clay Jacke chuan Nilaini khan Nipsey thattu hi first-degree murder, possession of a firearm leh, attempted voluntary manslaughter vangin thiam loh a chantir.

Kum 33 mi, Eric hian Grammy-nominated hip hop artist Nipsey hi Los Angeles-a a thawmhnaw dawr kawtah chhunlaiin a kap a, rapper hi a hmunah a thi nghal a ni.

Nipsey leh Eric-te hi naupan lai aṭanga inkawm tawh an ni a - Rollin 60s Crips gang-ah an tel dun ṭhin bakah, an puitlin hnu thleng pawhin an inkawm ho a, Eric-a lawyer chuan inhnial buaina boruak sosang tak vanga kap ta mai a nih thu court hmaah sawi mah se, a hremna hi tihnep a ni chuang lo a ni.

Eric hi damchhung tang tura hrem theih a nih loh avangin, rei tak tang tura hrem ni ta zawk a, a tan hun a hman zawh meuh chuan kum 90 chuang a ni tawh dawn a ni.