Vanglaini Bihchianna - Entrepreneur Huang; Pickle tui leh hrisel siamtu Chawngthu Kitchen

Chawngthu Kitchen hi June 16, 2015 aṭang khan Food License neiin mumal taka kalpui ṭan a ni. Mizo thlai thar leh kan rama tualṭo leh, sa lam chi te chu a tam vanglaia lakhawmin an dahṭha a, heng thlaite hi a rêm hnuah ei theih tura sawngbawl leh ṭhin a ni. An sawngbawl zinga langsar zaulte chu - Mautuai, Baibing, Kawhtebel, Lakher anthur (Roselle), Hmawngzik, Hmarchate, King chilli, Khanghu, Thingthupui, Zawngṭah mu, leh sa lam chi aṭangtein pickle tuihnai tak tak an siamchhuak ṭhin a ni. Mizorama thlaite, a hun laia ei sen lohte dahṭhat a, a 'season' zawh hnua ei tura buatsaih chu an chak leh tum ber a ni.

Sumdawnna bul ṭan dan : Chawngthu Kitchen neitu Lalrinmawia chuan, "Ka naupan lai aṭangin eitur vawnṭhat leh sawngbawl hi ka hobby a ni a, khang laia min puitu ber chu 'Zonu magazine' kha a ni. Zirna leh eizawnna thil dang han buaipui ve viau mah ila, ka tui thei tak tak lo a, ka tuina ber chu ti hian eizawnna atan hmang turin bul ka han ṭan ve ta rawih a ni," tiin Vanglaini a hrilh.

"Sum leh pai chuangliam nei hauh loin bul ka ṭan ve tawp a, beisei leh rin phak bakin Pathian malsawmna ka dawng a, product tharte neih belh zelin hma kan sawn zel a ni," a ti.

Hmachhawp leh thil tum : An sumdawnnaah nasa lehzuala beih chhoh zel a, Mizorama tharchhuah leh tualṭo eiturte vawnṭhat a, khawvel hriata phochhuah zel an tum. Mizorama ṭhalai, eitur sawngbawl ‘food processing’ lama tuimite tan eizawnna tur buatsaih chu an thil tum lian ber niin, an product-te chu mipuite tui tih dan ang bera sawngbawl chu an dahlen ber a ni bawk.

Hnathawh dan leh hnathawk chhawr : Chawngthu Kitchen-ah hian a ngheta hnathawk chhawr an nei hran lo a, a ṭul dan anga puitu tur erawh mi tam tak an mamawh ṭhin. Hlawh an pek ṭhin dan chungchangah, "An thawh mil zelin hlawh pek ṭhin an ni. Min puitute hi training pe pahin kan thawkho ṭhin a. Kan hnathawh dan hi hlawm thumin a ṭhen theih ang - a vawnṭhat hun, eitur sawngbawl hun leh, zawrh chhuah hun te kan nei ṭhin a ni" tiin Lalrinmawia chuan a sawi.

Bungraw sem/Delivery : Chawngthu Kitchen hian dawr hranpa nei loin; in aṭangin an semchhuak ṭhin. Dawr ṭhenkhatah pechhuakin; Famcart App kaltlangin an product tam zawk an hralhchhuak. An sumdawnna hlawhtlin chhanah Famcart chu an chhawr ṭangkai hle tih sawiin, "Famcart zarah hian kan market a ṭhat phah em em a, an Apps aṭanga order-te hi AMC area-ah a thlawnin min deliver sak ṭhin a, kan tan an hlu hle. Mimala order-te chu kan delivery partner ten an sem ṭhin bawk. State pawn leh foreign-ah kan thawn a, Delhi leh Kolkata-ah partner kan nei bawk a ni," an ti.

Sum lak luh dan : An sumdawnna kaltlanga sum an lakluh chungchang hi chiang taka tarlan a harsat thu an sawi. Thlai tam vanglai chuan lakluh hleihtheih an ni lo a, a hmanchhuahna lam a tam zawk ṭhin. 'Off Season' chu an inhralh hun a ni a, a market pawh a chhe hran lo. Kan ram tharchhuah leh siamchhuahte kan ngaihsan leh zual hun chuan a market a ṭhat chhoh zel an beisei tih an sawi.

Mizorama sumdawnna kalpui tum dan : Kuthnathawktute nen inthlunzawmin, kuthnathawktu/thlai chingtute pawhin hlawk zawka an hah man an hmuh a, ṭhalaiten an thiamna hmanga eizawnna ṭha leh hlu tak an neih zelna tur leh intodelhna kalpui chhoh zel chu an thil tum lian ber a ni.

Entrepreneurship chungchang : "Entrepre-neurship hi mi dawihzep leh thatchhe tan chuan kawng a awmlo hulhual a, mi tumruh leh huaisen tan chuan hlawhtlinna a ni. Thiam bikna sang tak nei tan chuan huaisen taka kan tuina kawnga kal hmiah hi a ṭha ber a; tin, bul ṭanna ropui leh ngelnghet sa taka kal nghal tumna hi beidawnna leh hlawhchhamna a ni. Rinawmna leh taimakna (teirei peihna) nen he kawng hi huaisen taka zawh a ngai.

"Ka ṭhalaipuite, tun aia nasa zawka intodelhna kawng kan zawh a, kan ram leh hnam tan mi chhenfakawm leh mi ropui nih tum zel ila, kan ram leilung hausakna chhawr ṭangkaia khawvel hriata kan ram phochhuak tura taima taka hnathawh hi kan mawhphurhna a ni."