Hollywood award season-ah RRR a langsar chho zel

SS Rajamouli produce RRR chuan Hollywood award season-ah thawm a nei lian chho zel a, Golden Globes leh Critics Choice Awards-ah te chawimawina a dawn hnuah, Inrinni zana semchhuah Hollywood Critics Association Awards-ah pawh a langsar leh hle.

RRR hian Best International Film a dawn bakah, award lian pathum Best Action Film, Best Stunt, leh Oscar-nominated 'Naatu Naatu' pualin Best Original Song-ahte award a hum haw a ni.

Kumin kumtir khan, RRR hian Critics Choice Awards-ah Best Foreign Language Film leh Best Original Song a lo dawng tawh a, Naatu Naatu vang bawk hian 80th Golden Globe Awards-ah Best Song atan thlan a lo ni tawh bawk.

He film-a a changtu pahnih, Ram Charan leh Jr NTR-te chuan kum 1920 chhoa British awpna hnuaia India a awm laia an chhungkua leh hnam bil tan ve vea zalenna an sual dan chanchin chu hmuhnawm takin an rawn tarlang a, he film hi darkar thum vel zeta rei ni mah se a storyline a fuh em avangin a ninawm hman meuh lo tih chu award leh hlawhtlinna chan aṭangte hian a chiang mai awm e.

RRR hi Rs vbc 550 senga siam niin, Indian film siam tawha la hautak ber a ni.

July 30, 2020-a tlangzarh tura ruahman ni mah se, production delay leh Covid-19 hripui leng vanga sawnhlat a nih hnuah, March 25, 2022 khan theatre-ah tlangzarh a ni. RRR hian tlangzarh ni bikah Rs vbc 240 a lalut nghal a, Indian film zinga film sum hailut tam ber a ni nghal a ni. Khawvel huapah Rs vbc 1300 dawn a lalut a tawh a ni.