Social media hunlaia piangte hi ka lainat ṭhin : Hugh Jackman

X-Men film series-a Logan/Wolverine lema hnehsawh taka chang ṭhin, Hugh Jackman chuan ṭhalai, a bikin social media hunlaia piangte chuan tunhma zawnga aiin an thiltihna kawngah pressure an ngah tawh thu sawiin, tleirawlte hian hun harsa tak an paltlang thu a sawi.

Kum 54 mi lemchanthiam chuan, "Tleirawl nih hi a harsa dawn hian ka hria. Hripui leng hian a ti harsa zual ve bawk a ni. Social media a awm a, kan tleirawl hunlai nen kha chuan khaikhin rual a ni tawh lo," tiin, "Ka tleirawl nun kha a awlai bik lo a, mahse, tun hi a harsa lai ber niin ka hria a, ka ngaihdan ka rawn sawi tih erawh min lo hriatsak thung rawh u," tiin Hugh chuan a sawi.

Hugh hian a nupui Deborra-Lee Furness nen fa pahnih, Oscar, 22, leh Ava, 17 an nei mek a, a fate nun chu hrethiam pha lo mah se tunhma zawng aiin nawrna an tawng nasa zawk a ni, a ti.

Australian actor hi 'live action Marvel character' lem chang rei ber a ni ṭhin a, he record duhawm tak hi kum 2021 khan a chan a ni. Hugh hian lemchan khawvela chawimawina sang Golden Globe Award, Primetime Emmy Award, Grammy Award leh, Tony Awards-te chu a dawng kim vek tawh a, Wolverine character kan sawi dawn apiangin a hming leh hmel hi kumkhuaa dai tawh lo tur a ni.