Khiangte Construction Ṭhazual Lengzem; Manuna'n "Rinmawi" nen chart chung ber a luah

Khiangte Construction Ṭhazual Lengzem chart thar berah Hard Ray band aṭanga kan hriat lar Manuna music video thar "Rinmawi" chuan pen khata hma rawn sawnin, tunah chuan chart chung ber a rawn luah ta.

Kum 2008 chhoah "Engtin" tih hla hmanga Zoram dengchhuaktu Manuna'n hun eng emaw chen hla hit tiha sawi tur a neih loh hnuah tunhnai khan "Thinlung Hliam" tih hla chu a rawn hlawhtlinpui hle a, R. Lallunghnema hla phuah "Rinmawi" tih hla mawi tak hmangin Ṭhazual chart chung ber a rawn luah leh thei ta a ni.

Eddie Pachuau leh F. Laldinmawii

Mizo Idol Season 7 top 10 zinga mi Eddie Pachuau hla thar "Bawihte" chu pahnihnaah a rawn inhlangkai bawk a; "A mak ka ti," tih hla hmanga min zairual tirtu dual dual ṭhintu F. Laldinmawii'n rimawi lama a rawn 'comeback' na hla, kar thum liam ta chauha a tihchhuah "Ka duhaisam" pawhin top 3 a rawn chuangkai ve leh ta bawk a ni.

Chart-a lang dang te chu...

Chart tihchhuah tharah hian Mizo Idol Season 7 top 10 zinga pathum Saka, Hmangaihi leh Eddie Pachuau-te an lang a, an thawhhlawk hle. Chung zingah chuan Mizo Idol Season 7 winner T. Vanlalhmangaihi hla, Amawii film Original soundtrack "I awm tlat si" chu chart-ah a rawn chuangkai bawk a, Marina Hriatpuii Ralte "Chhingmitthla" pawhin hmalam rawn pan zelin panganaah a rawn lang tawh a ni.

Polysphere, Saka, Vanzara, Mercy Remsangmuani, leh David Darlong-te chu chart-a lang dangte an ni.