Billboard-ah Miley leh SZA an huangtau - Miley = 6; SZA = 10

Billboard Hot 100-ah Miley Cyrus "Flowers" par mawina thliak thei khawpa hla mawi a la awm lo a, kar ruk chhung chu a zawnin a chart chung ber a luah ta. 200 album chart-ah SZA studio album pahnihna "SOS" chuan kar 10 chhung zet (a zawn ni lo) ro a rel ta bawk a, hmeichhe artist pahnihte hian kum bul an ṭan fuh cher cher hle.

Miley album-ah hla 13 awm dawn

Miley hian nimin khan a studio album pariatna nghahhlelh awm tak, "Endless Summer Vacation"-a hla awm tur, tracklist chu tichhuakin, he album-ah hian hla 13 a awm dawn a, March 10-a tlangzarh tura tih a ni.

Kum 30 mi pop star hian a pasal hlui Liams Hemsworth piancham, January 13 khan "Flowers" hi tichhuakin, tuna a album tihchhuah tura hla ṭhenkhatte pawh hi a pasal hlui nena an inlaichinna hlawhchhamta chunchang, hla thu hmangin a rawn chham chhuahna a ni leh dawn a, hei hian ngaihthlak a tichakawm zual tawh hle .

Dai ngai lohna ramah SZA

Album chart lamah SZA "SOS" chuan a la dai ngai loh ram thlengin, kar 10 chhung chu pakhatna a ni tawh a ni. "SOS" hi kum 2010 hnua kar 10 aia rei No. 1 ni thei album pariatna niin, hmeichhe artist zingah Adele "25" hnua dinhmun sang chelh leh thei hmasa ber a ni.

Album chart-a a chet ṭhat tlukzertin singles chart-ah pawh a che pui leh hle a, "Nobody Gets Me" leh "Kill Bill"-te chu Hot 100 top 10 huangah an lang ve ve tawh bawk.