Elon Musk-a'n hausa ber nihna chelh leh ta; 3-na aṭangin 30-naah Gautam Adani a tla thla

December 2022-a khawvela pa hausa ber nihna a hloh hnuah, Tesla CEO Elon Musk chuan a dinhmun chhuhsaktu France luxury brand Louis Vuitton’s neitu Bernard Arnault chu lehpelin khawvela pa hausa ber nihna rawn chelh leh ta.

Bloomberg Billionaires Index-i'n nimina khawvela mi hausa tawntaw list a tihchhuah tharah Elon Musk a net worth hi USD tluklehdingawn 187 niin, tld 185 hu sumdawnna neitu Arnault hi a lehpel a ni. Elon Musk lo chungnun leh chhan lian tak chu a company Tesla share pricing ṭhan chak vang a ni.

November 2021 aṭanga December 2022 inkarah Tesla share hi USD tld vel 200 zetin a tlahniam hman a, hetiang zata tam sum hloh thei hmasa ber chu Musk tho hi a ni. Hemi inkarah hian Tesla hotu hian Covid hripui leng leh, Twitter lei tuma thubuai an neih lai inkar niin, USD tld 340 aṭangin USD tld 137 velah a net worth hi tla thla hman mah se, tunah erawh dinhmun sang ber a rawn chelh leh ta a ni.

Adani-a'n tld 150 dawn a hloh tawh

Hindenburg report vanga court thubuai nei lai, Adani Group dintu Gautam Adani chu khawvel mi hausa list-a pathumna leh, Asia khawmualpuia pa hausa ber a nihna aṭanga paihthlak niin, list-ah hian 30-naah a tlathla dawrh a ni.

Bloomberg chuan Adani net worth hi USD tld 40 hu nei angin a chhutsak a, January 24-a Hindenburg-i'n report a tihchhuah aṭangin Adani hian USD tld 150 dawn a hloh tawh tih an tarlang.