"Kan Chapchar Kût, Kan Kût Bîk" a vawi khatna buatsaih dawn!

'Bbyanimals' leh 'Local All Natural Soda' te ṭangkawp chuan Mizoram Rural Bank 'Kan Chapchar Kût' music festival chu naktuk zan, February 3 hian Mizo Brewery, Industrial Growth Centre, Luangmual-ah an buatsaih dawn. Ticket hi Rs 300 man chauh a ni dawn a, tlai dar 5 aṭangin gate hawn ṭan a ni ang.

BbyAnimals & Local-te hi live music event organizer lian ber zinga mi niin, tunhnaiah live music event 15 chuang an buatsaih tawh a, nikum December thla khan "LOCAL MUSIC FESTIVAL" chu hlawhtling takin an lo buatsaih tawh bawk a ni.

"Ṭhangtharte'n Chapchar Kût kan hlut lo"

Mizote kût ropui ber 'Chapchar Kût' hi ṭhangtharte'n kan hlut lo tial tial nia hriain, event buatsaihtute chuan rimawi ngaisang leh thiam bik nia an sawi ṭhin, Mizote'n music festival lian hi kan neih a hun ve tawh nia ngaiin he event hi an buatsaih dawn a ni.

Chapchar Kut hi state dang festival “Hornbill Festival” te anga khualzin tam tak hiplut a, sum tam zawk hailut thei tur leh, khawvel huapa Mizo te kût ropui ber hi pho chhuah a nih theih nan he event - "Kan Chapchar Kut, Kan Kut Bik" hi buatsaih an nih thu Vanglaini an hrilh. Kan kût ropui ber hi ṭhalai leh mipui intihhlimna ai mahin sorkar programme pakhat ang maiah an ngai tawh a, a kum telin ṭhalai (kum 15-30 inkar) te'n an hlut lo tial tial chu ngaimawhin he event hi buatsaih tura hma la an nih thu an sawi.

Zaithiam inlan turte an hrawl dawn e

He hunah hian ram pum huapa Mizo min tihmingṭha tawhtu artists hrang hrang an inlan dawn a, kum riat zet rimawi an chawlhsan hnuah Freddy's Nightmare chu an rawn 'comeback' dawn a, hei ngawt pawh hi event chhim chhan tlak a ni.

Hei bakah hian Mizoten kan musical band neih ṭhat Avora Records leh The Prophets bakah, band ṭha si mi nawlpuiin kan la hriat lar loh Your Sweetest Memories leh Be Run Over-te pawh an inlan ang.

Rap music ngainatute tan Mizote zingah anni bak an awm chuang lo ang tih theih khawp - G'nie leh Jelo te chetla lai hmuh tur a awm dawn bawk a, 'vibe' hran hlak nei Matilda Amawii'n a aw mawi tak hmangin kalkhawmte a awi bawk ang.