Hong Kong Model Abby Choi thihnain ngaihvena hlawh

Chinese model leh socialite Abby Choi thihdan rapthlak tak chuan mipui ngaihven a hlawh chho zel a, social media titi lian a ni chho mek.

Kum 28 mi Hong Kong model hi February 21 khan chin hriat loha a bo thu tarlan a ni a, ni hnih hnuah Tai Po khuaah a taksa them ṭhenkhat chu refrigerator leh pot chhungah hmuh niin, helai hmunah vek hian sa herna khawl, chainsaw, tuboh, face shield, leh mihring taksa them awmna soup pot pahnih hmuh a nih thu South China Morning Post (SCMP) chuan a tarlang. Heng anga thihna rapthlak tak hi Chinese territory-ah hriat ngai zen zen a nih loh avangin mipui a tithlabar hle.

Thawhṭanni zing khan Abby pasal hlui, Alex Kwong Kong-chi leh an chhungkaw member ṭhenkhat chu he tualthihnaah hian an inhnamhnawih nia ngaiin rinhlelh thuah tualthah thubuai siamsak nghal an ni.

Eng vanga Abby Choi thihna hian ngaihven a hlawh?

Abby Choi hi model a nih piah lamah social media influencer lawm hlawh tak a ni a, fashion show leh photo shoot lian tak takah te lo inlan tawhin, tunhnai lawk khan Paris Fashion Week, Dior Show-ah pawh a inlan nghe nghe.

Instagram-ah followers nuai chuang neiin, a thih hma lawk pawh khan fashion publication L’Officiel Monaco cover-ahte a langin, international publication lian heng Elle, Vogue, leh Harper’s Bazaar-te tan a lo inlan tawh bawk a, chutiang khawpa model hlawhtling chu a ni.

Abby Choi hi China-a sumdawng hlawhtling tak fanu niin, an sumdawnna hlutzawng hi HK dollar maktaduai 100 hu lai a ni.

Choi hian amah thattu nia puh, Alex Kwong nen fa pahniha an nei a, tuna a kawppui Tam Chuk Kwan nen fa pahnih dang a nei bawk. A pasal hlui Alex hian a fate pahnih hi enkawlin, an inṭhen hnuah pawh Abby hian a ngaihsak hle tih sawiin, luxury apartment pawh a leisak hial niin report chuan a tarlang.

Thuneitute chuan Abby thah a nihna chhan hi ngawrh taka an la chhui zui mek avangin thuchiang tak an la sawi thei lo a, mahse, tualchhung media-te chuan Abby leh a pasal hluite inkarah Hong Kong dollar maktaduai tel ro inchuhna avanga he thihna hi thleng niin an sawi thung a ni.