Box Office-ah 'Cocaine Bear'-in 'Ant-Man 3' a chhaih buai pha lo

Marvel Cinematic Universe (MCU) phase 5 a film tihchhuah hmasak ber "Ant-Man and the Wasp: Quantumania" chuan kar liamtaa USD mtd 100 chuang a lakluh hnuah, entu 69.7% zetin an tlahniam a, MCU film a entu tlahniam chak ber ni ṭhin "Black Widow" 67.8% chu a rawn khum. Ant Man 3 hian thawm rawn nei lian chho viau mah se critics tam takin an sawiselna ṭhenkhat erawh a dikna lai chen a awm tih a lang a, kar liam ta chhung khan USD mtd 32 chiah a lalut phak a ni.

Comedy horror film 'Cocaine Bear' chu beisei lawk aiin a rawn che ṭha ta thung a, theatre 3,534 aṭangin USD mtd 23.1 lai lalut phak mah se, Ant Man chhaih buai pha tur erawh chuan a la nau deuh.

Savawm man toin lawm a hlawh

Elizabeth Banks-i'n thil thleng tak tak behchhana a siam, "Cocaine Bear" hi kum 1985-a savawm pakhatin USD mtd chuang hu cocaine bo a lo dawlh zawh vek dan chanchin nuihzatthlak tak tarlanna niin mi lawm a hlawh hle a, USD mtd 15-20 bawr lalut tura chhut ni mah se khawvel huapah USD mtd 28.4 lai a hailut thei a, Rotten Tomatoes chuan 6.2/10 rating a pe bawk a ni.

'Jesus Revolution'-in ratings a hmu sang

Jesus Revolution lehkhabu behchhana an siam, Kristian drama film "Jesus Revolution" hi kum 1960's tawp lama California aṭanga 'Jesus Movement' lo inṭan dan leh, North America, Europe khawmualpui leh Central America thlenga harhtharna an chan dan chanchin ngaihnawm tak tarlanna niin, Rotten Tomatoes leh platform dang aṭangin audience rating 90% chuang a hmu phak a, USD mtd 6 vel bawr lalut tura tih khan USD mtd 15.5 lai a lalut thei.

Avatar chu kar 11 chhung zet chart-ah a cham tawh a, kar hmasa aiin entu 28.2% in an tlahniam a, "Puss in Boots: The Last Wish" chu panganaah a la inhamtang a ni.