May thlaah Ed Sheeran album thar '-'kan hmu dawn; "Hla phuah hi ka natna thawi damtu a ni" - Sheeran

English singer-songwriter, Ed Sheeran chuan social media kaltlangin Nilaini khan album thar a tihchhuah tur thu a puang a, a album hmingah "-" (subtract) tih a ni dawn a, Atlantic Records hnuaiah May 5 hian tlangzarh a ni ang.

Ed Sheeran chuan subtract album tichhuak turin kum 10 chuang zet a bei tawh tih sawiin, "Acoustic album ṭha ber leh ka suangtuahna angte tichhuak turin hla 100 chuang ka ziakin recording kan neihpui tawh. Kum 2022 kum bul khan ka nuna thil thleng hrang hrangte avangin keimahah danglamna tam tak a thlen a, ka rilru lam hriselna bakah, music leh art ka thlir dan thlengin min thlaksak a ni," tiin Sheeran chuan album a buaipui chhoh dan a sawi.

"Hla phuah hi ka natna thawi damtu a ni a, ka thinlung chhungril ber ka phochhuah theihna a ni," tiin "Perfect" hitmaker chuan a sawi. "Eng hlate nge ka phuah dawn tih ka ngaihtuah hmasa ngai lo a, ka rilrua lo lang hmasa apiang ka ziak mai ṭhin. Tichuan kar khat chhung lekin, kum 10 chhunga ka hnathawhte chu ka ngaihtuahna thim leh thuk tak aṭangin ka thlak leh a ni," tiin a hla phuah tura hun a hman dan chungchang a sawi.

Sheeran hian mathematical sign hmangin album hming hi a phuah ṭhin a, chung zinga a hnuhnung ber tur chu subtract hi a ni. Sheeran hian September 2011 khan a album hmasa ber '+ (Plus)' a tichhuak a, khawvel huapah a hlawhtling nghal hle a, artist ropui bik ni tura kawng a zawh ṭanna a ni. June 2014 khan a studio album pahnihna 'x (Multiply)' chu tichhuak lehin, kum 2015 chhunga khawvela album hralhchhuah hnem lamah pahnihna a ni phak. March 2017-ah "Perfect", "Shape of You" leh "Castle on the Hill" tih hla awmna '÷ (Divide)' chu tichhuak lehin, hei erawh dan rual lohin khawvel huapa album hralh ṭha ber nihna chu a chelh chiang ta hle.

Kum thum dawn a chawlh hnuah, kum 2021 khan '= (Equals)' chu a tichhuak leh a, a hlawhtlin piah lamah khawvel huap chart hrang hrangah pakhatna a ni fai deuh vek a ni. Sheeran hian album copy mtd 150 chuang hralhchhuak tawhin, artist hlawhtling kan sawi apiangin Ed Sheeran-a hming hi kan lam hmaih a thiang tawh lo a ni.