Oscars sem tur zingah Deepika Padukone; India tan kum chhinchhiah tlak ni thei dawn

Bollywood actress huhang ngah ber pawl, Deepika Padukone chuan film lama chawimawina sang 95th Oscar awards sem tur zingah a hming a lan thu tarlangin, Deepika bakah hian khawvel huap celebrity langsar Emily Blunt, Dwayne Johnson, Jennifer Connelly, Samuel L. Jackson, Zoe Saldana, Jonathan Majors leh Questlove-te pawh award semnaah hian an inlan ang. Deepika hi Shah Rukh Khan nena an channa "Pathaan" chuan hlawhtlinna hrang hrang a chang chho zel a, kumina film sum hailut hnem ber niin, January 25-a tlangzarh chauh kha la ni mah se, India film tlangzarh tawha sum thawhchhuah tam lamah pangana dinhmun a hauh leh der tawh a ni.

India aṭangin award pathum dawng thei

India aṭangin hla pakhat leh docu-mentary pahnihin nomination an hmu a, Deepika chu award semtu zingah a tel lehzel bawk avangin kumin Oscars hi India tan a hlu lehzual bik hle.

SS Rajamouli kutchhuak 'RRR' chu Best Original Song category dawng thei turin a hming a lang a. Hetihlai hian, India kutchhuak 'All That Breathes' leh 'The Elephant Whisperers' te chu Best Documentary Feature Film leh, Best Documentary Short Film dawng thei turin dinhmun ṭha takah an ding mek bawk a ni.

Hei mai a la ni lo, 'RRR' original song 'Naatu Naatu' hmangin Oscar dawhsanah lam an thai dawn a, he hla satu leh a changtu ni bawk Rahul Sipligunj leh Kaala Bhairava te'n eng angin nge mipui an lamtir leh dawn hriat a chakawm tawh hle.