Chapchar Rimawi Kût a hlawhtling; Mipuiin live music an hlut

Mizo Zaimi Inzawmkhawm (MZI) Gen. Hqrs chuan Inrinni liam ta, March 4 khan AR Lammual-ah Chapchar Rimawi Kût – Live music hlang hmangin an buatsaih a, mipuiin an hlut hle.

MZI Charpchar Rimawi Kût-ah hian chawhnu dar 1 aṭanga zan dar 9 thlengin live band ṭha tak takten kalkhawmte hi an awi a. Mizoten band kan neih ṭhat ber ber Boomarang, Magdalene, Even Flow, To Coda, Er. Sanglura band, Forever Young, Zonun band leh NGO te pawh an inlan a, anni bakah hian Mizo mipuiten kan la hriat lar lutuk loh band ṭha, nakin lawka Zoram pum huapa band langsar la ni mai tur eng emaw zat an inlan bawk.

Chapchar Rimawi Kût zan lam hun hi MZI patron R Lalzirliana pawhin hmanpuiin, MZI Patron chuan "Rimawi tumtu (musician) te hi mipuiin kan chawimawi an phu" tiin Chapchar Rimawi Kût hmangtu zawng zawng chibai bukin duhsakna a hlan a ni.

MZI Chapchar Rimawi Kût hi a vawi khatna a ni a, rokhawlhna dang a awm a nih loh chuan live music hmanga kum tina neih tura ruahman a ni. Tun ṭumah hian MZI senior member K.C. Runremsangi chu India sorkarin civil mite chawimawina sang - Padma Shri dawng tura a thlan avang leh, Art huang aṭanga thlan a nih avanga lawmpuina leh chawimawina MZI hmingin MZI President Er Lalrothanga'n a hlan bawk.