KISS-in rimawia bul an ṭannaah tour hnuhnung ber nei dawn

Rock n roll legend, American rock band KISS chuan an tour hnuhnung ber “The End Of The Road Tour ” chu kumin October thla aṭang hian an chhunzawm leh dawn. Tour kharna hi an rawn lar chhuahna New York khawpui, Madison Square Garden-ah December 2, 2023 hian an nei ang. Band anga rimawi an mangṭhana hun pawimawh bik hi an hmang dawn a ni.

Kiss hian January 31, 2019 aṭang khan tour hi an nei ṭan a, Covid-19 hripui leng vangin hun eng emaw chen an chawlh lailawk hnuah November 2020 aṭang khan an chhunzawm leh thei ta chauh a ni.

Paul Stanley (vocals, rhythm guitar), Gene Simmons (vocals, bass), Ace Frehley (lead guitar, vocals), leh Peter Criss (drums, vocals) awmna Kiss hi kum 1973 khan New York khawpuiah din a ni a, rimawi an thiam piah lamah, an hmelhmang an chei danglam dante leh, rimawi dawhsan an chuankai laia an thuam dangdai takte avangin mi hriat an hlawh hle.

Kum 2014 khan Kiss original member mi palite chu Rock and Roll Hall of Fame-ah lakluh an ni a, MTV-in "Greatest Metal Band of All Time" list an tihchhuahah pakuana lai an hauh phak a ni.

"Kiss hi rock and roll band tih hian a sawifiah zo lo. Band leh fans-te hi thlahtu khat ang mai kan ni. Rimawi vanga mi hip khawmtu kan ni thei hi chawimawina sang tak a ni a. Kan fans te hi kan nunna hnar pakhat an ni a, kan thisen zawmpuite an ni. Kan lo pian ve theihna chhan chu anni hi an ni. He tour hi kum 40 chhunga Kiss leh fans inlaichinna ṭha tarlangtu a ni,"

- Paul Stanley