Khiangte Construction Ṭhazual Gospel; Lalthansangi hun a inherchhuak leh ta!
"Heiden rial" tih hla mawi tak hmanga Zoram dengchhuaktu, Lalthansangi chuan a hla thar "A ram chu ram hlun a ni" tih hla hmangin Ṭhazual Chart chung ber a rawn luah leh ta!
Hei mai a ni lo, Lalthansangi hian a hla dang "Misual ka ni Lalpa min ngaidam rawh" tih hla chu pasarihnaah a rawn lanpui thei bawk a, atan hun ṭha a rawn inher chho leh ṭan mek a tih theih awm e.
Thansangi hian tunhma lama a hla thluk ngaihthlak nuam tak ang bawkin he hla hi a rawn sa leh a, a zai dan style ngaina tan leh, a zuna uai tawh laklawh tan ngaihthlak nin har ngawt ta ve ang. He hla hi CS Roṭhuama phuah niin, music leh video siamtu hi Ardy a ni. Lalthansangi YouTube channel-ah eng tik lai pawha hmehchhuah mai theih tura chhawpchhuah a ni.
Tuikual North KṬP band & Maruati
Tuikual North Branch KṬP band chuan chart chhuahsan mai an la tum lo a; hmalam rawn pan zelin, an single "Thlamuantu" tih hla chu pahnihnaah an rawn inhlangkaipui. Music video hmuhnuam tak nen an kalkawp tir avangin chart thar berah pakhatna ni thei tur pawhin dinhmun ṭha takah an ding mek a tih theih ang.
Tunlai hmeichhe gospel singer kan neih ṭhat berte zinga mi, Maruati'n Mizo hla chauh ni lo pawh a sa thiam tih a rawn lantir a Hmar hla mawi tak leh a zai dan style ngai rengin a rawn sa chhuak thei tlat. Hei vang hian a music video thar ber "Rimawi tak tak" chuan a phu ang ngeiin dinhmun sang a rawn chelh nghal a, top 3-ah a rawn zuang lut leh der tawh a ni.
Chart a rawn lang tharte chu...
Palinaah an aw leh musical instrument mawi tak leh thiam taka rawn tarlang ṭhintu, Amosa Vocal Point chuan "Nangchu Pathian pangngai reng" tih hla chu an rawn thlawh fuh lehpek hle a, an zaithiam piah lama an music kalhmangte hian beng a verh ṭhin hle a, anni pawhin san lam an rawn pan zel.
Panganaah hian mi tam zawkin kan la hriat lar loh, Lalnuntluangi hla "Beramno thianghlim" chu rawn langin, a thiam zia hre duh tan awlsam tein YouTube lamah ngaihthlak mai theih a ni.
Anni bakah hian Rebecca Fanai, Vri Pautu & Kimkima Khiangte ft Murfelo, Puipuia Chhakchhuak leh Christina Vanlalnghaki-te chu chart a rawn lang te an ni.
