Kim K-i'n kawppui thar zawnpui turin a ṭhiante ngen

Keeping Up with the Kardashians star, Kim Kardashian chu Pete Davidson nen thla kua chhung an inzui hnua an inkar an tihtawp hnuah, kawppui thar a melh leh ṭan niin a lang.

Kum 42 mi, Kim K chuan a ṭhiante chu punin, a kawppui awm mi zawnpui turin a pun a, mahse, celebrity dang erawh date a tum tawh lo niin khawthlang media-te chuan an tarlang.

Instagram-a followers maktaduai 347 zet neitu hi a pasal hlui Kanye West nena an inṭhen hnuah comedian Pete Davidson nen thla kua chhung vel an inzui leh a, milar tihtakah kawppui nghet neih a harsat ve ṭhin hle.

Kim hian pasal vawi thum a nei tawh a, Kanye nen fa pali - North(9), Saint(7), Chicago(5), Psalm(3) an nei hman. Kum 42 mi lai ni tawh mah se Kim chuan eng tik niah emaw chuan pasal neih leh a, fa dang neih belh zel a tum thu sawiin, "Ka ngaihtuahna hi a vakkual nasa ṭhin hle a, vawi lina hi ka vanneihna tur pawh a ni mahna, ka hlawhtlin ngei ka ring tawh a ni," tiin a pasal palina chuan vanneihna a rawn kentelpui ngei a beisei tawh thu a sawichhuak.

Kim hi kum 2000-2004 inkar khan music producer Damon Thomas nen an innei tawh a, chumi hnuah NBA player Kris Humphries nen 2011-2013 inkar inneih mah se, Kim chuan Kris nena an inneih aṭanga ni 72 hnu lekah inṭhenna lehkha a thehlut zui leh a ni.