Hindi film sum lalut hnem ber - Pathaan

Bollywood legend, Shah Rukh Khan-a'n lemchan khawvel a mangṭha hlen dawn emaw tia mi tam tak an inzawh laiin, a comeback film "Pathaan" zet zawng a pui ngei e. Pathaan hian record hrang hrang a siam hnuah tuilet hnua Bollywood film chhuak tawh zingah sum hailut hnem ber dinhmun chu hun rei lote chhungin a rawn hauh ta der mai le!

Tlangzarh a nih hma hauh aṭangin hnam ziarang leh sakhaw thil tibawrhbang thei tia demna leh sawiselnate pawh tawng bawk mah se, hengte hian SRK fans te a dang zo chuang lo. Republic Day, January 25 khan theatre-ah pekchhuah ṭan niin, tlangzarh ni bika sum hailut hnem ber aṭanga Rs vbc 100, 200, 300, 400 aṭanga 500 thlenga sum lalut rang ber a rawn ni chho char char a, Rs vbc 511 lalluttu record chelhlai ni bawk "Baahubali: The Conclusion" chu Thawhṭanni khan a khum a, nimin thleng a Indian box office bika a sum lakluh belhkhawm hi Rs vbc 532 vel niin film trade analyst Taran Adarsh chuan a tarlang.

Khawvel pumah Rs vbc 1,000 chuang lalut tawh

Siddharth Anand kutchhuak, action-spy thriller film, SRK bakah Hollywood thleng pawha mikhual lo tak Deepika Padukone leh John Abraham inlanna 'Pathaan' hian khawvel pumah Rs vbc 1,033 lalut tawhin, ram pawna a sum lakluh zat hi Rs vbc 388 vel a ni.

Hindi film bika sum lalut hnem te :

1. Pathaan 2. Baahubali 2

3. KGF Chapter 2 4. Dangal