CREED III-in USD mtd 58.6 a hnekchhuak

Boxing leh infiamna lam ngainatute tana film hmuhnawm bik CREED III chuan thawm a rawn nei na nghal hle a, box office chung berah a rawn inhlangkai.

He film-a a changtupa Michael B. Jordan chuan role pawimawh a chelh mai bakah amah vekin a direct nghal bawk a, Sylvester Stallone-a'n kumkhuaa film dai tawh ngai tawh lo tur zinga mi Rocky film series a hnutchhiah kal zela film pakuana leh, kum 2018-a tihchhuah Creed II chhunzawmna a nih tel avangin a hmuhnawm dawn tih a chiang hle.

Creed III hnek a ná; Ant Man entu tlahniam nasa

Creed III hian kar liam ta khan US bikah USD mtd 58.6 lalutin, khawvel huapah USD mtd 101 dawn a hailut tawh a ni. Creed III hian kar liam ta lama pakhatna "Ant Man 3" chu a knockout chiang hle a, kar hmasa nena khaikhinin Ant Man entu hi 61% zetin an tlakhniam belh leh a, hetichung hian tualchhunga a sum lakluh erawh USD mtd 200 dawn chu a tling phak tho a, critics te'n dahsang lua lo mah se film hlawhchham tiha sawi chi erawh a ni lo ang.

Demon Slayer a rawn kir

Savawm manto tiha kan sawi, "Cocaine Bear" chuan USD mtd 11 lalutin, entu hi 52.6% zetin an tlahniam. Anime series-a episode larzual dahkhawm "Demon Slayer: Kimetsu No Yaiba - To the Swordsmith Village" chu palinaah awmin, USD mtd 10 a lalut a, anime ngainatute tan chuan en manhla tak tur a ni.

USD mtd 15 vel chauh senga siam, Kelsey Grammer channa "Jesus Revolution" hmangin harhtharna a thleng chhunzawm zel a, he film hian USD mtd 8.65 lakluh belhin, tualchhung bikah mtd 30 chuang a hailut der tawh a ni.