Jeff Bezos-a'n khawvela lawngléng sang ber; USD mtd 500 senga siam pholang

Mi hausa tawntaw, Amazon executive chairman Jeff Bezos chuan a siamna atan ringawt pawha USD mtd 500 chuang a senna, nuamtawlna lawngleng, yatch thar chu mipui hmuh theihin a pholang.

Bezos chuan a lawng hmingah hian Koru (bulṭanna thar) tih a vuah a, ft 230 zeta sei niin, Netherlands-a hmunpui nei Oceanco kutchhuak a ni.

Kum 2018 aṭanga siam ṭan niin, a siamnan hian kum nga chhung hun an hmang a ni. Forbes chuan Bezos hlutna hi USD tld 115.4 angin a tarlang a, khawvel pa hausa list-ah pathumna dinhmun a hauh mek a ni.

He lawngleng hi a man a to ang bawkin a enkawlna senso pawh a hautak rem rem hle a, a enkawlna atan ringawt pawh kumtin USD mtd 25 vel an sen a ngai dawn ang.

Kum 59 mi Bezos hi a nupui hlui MacKenzie nen kum 25 an inneih hnuin January, 2019 khan an inṭhen a, tunah hian TV personality, lemchanthiam leh businesswoman Lauren Sanchez nen an inzui mek a ni.