Box Office-ah sum lengvel a la tlem The Rental bawk No.1 a ni leh

Theatre tam ber khar la ni mah se Box Office chart chu tihchhuah chhunzawm a la ni zel a, budget sang film ho erawh film siamtute'n an la tlangzarh ngam lo chhunzawm zel a, chumi a nih avang chuan chart hmasa lama pakhatna The Rental bawk sum lalut tam ber a ni leh.

Boruak pangngaiah chuan Theatre 4000 chuangah film hi pek chhuah a ni ṭhin a, hri a len miau avangin theatre tam ber khar a la nih avangin kar tawp liam taah pawh khan The Rental hi theatre 242-ah chiah chhuah a ni leh a, heta ṭang hian sum $290,272 a lalut a ni. Dave Franco film siam, horror film hian US-ah chuan  $888,783 a lalut tawh a, khawvel puma a sum lakluh chu $1,069,085 a ni tawh. Tun ang boruakah chuan sum lalut chhe lutuk a ni lo pawh ti ila kan sawi sual lem lo ang.

Big budget film tlangzarh ngam a nih tak loah chuan tunhmaa film lo hit sa tawh ṭhin tlangzarh nawn leh a awm nual a, chung film-te chuan kar tawp Box office chart an luah khat a ni ber mai.

Sum lalut tam ber dawttu chu The Goonies (re-release) a ni a, theatre 145 aṭangin sum $150,000 a lalut a, The Groonies hi kum 1985-a tlangzarh daih tawh kha niin  adventure comedy film a ni. Pathumna pawh Jurassic Park (re-release) a ni a, theatre 246-a chhuah a ni thung a ni thung. Back to the Future (re-re­lease) chu palina a ni a, Grease (re-release) chu pangana a ni a, Top 5-ah hian The Rental chiah hi film thar hlak a awm a ni.

Box Office Top 10-ah hian film thar hlak pahnih inlan thar a awm a, pasarihna Summerland leh 10-na Killer Raccoons 2: Dark Christmas in the Dark chu film thar niin film thar en tur duh tan chuan ngaihven chi a ni ang.

1    The Rental    $290,272

2    The Goonies (2020 Re-release)    $150,000

3    Jurassic Park (2020 Re-release)    $117,000

4    Back to the Future (2020 Re-release)    $107,000

5    Grease (Re-release)    $102,000

6    The Big Ugly    $89,326

7    Summerland    $28,881

8    The Wretched    $13,88

9    Relic    $9,525

10    Killer Raccoons 2: Dark Christmas in the Dark    $3,472