Miley rorelna titawptu The Weeknd & Ariana; Album chart-ah kan la hriat tam loh Karol G

Zaithiam zingah rau rau pawh hian inkawprem bik tak hi an awm a, chung zingah chuan The Weeknd leh Ariana Grande-te pawh hi lam hmaih theih an ni awm lo e.

Canadian singer, The Weeknd leh, American singer Ariana thawhdunna, February 24-a tihchhuah "Die for you(Remix)" chuan kar ruk chhung zet Hot 100 chart roreltu Miley "Flowers" par mawina chu rawn thliakin a rorelna chu an tihtawp sak ta a, chart chung ber an rawn hauh ta vang mai le.

Ariana + The Weeknd = Hit! hit! hit!

Artist pahnihte hi hla paliah an lo thawkdun tawh a, "Love Me Harder", "Off The Table", "Save Your Tears(Remix)" leh tuna an hla thar ber "Die For you" te an ni a, an pahniha an thawhdunna hi chu a hit viau zel ti ila kan sawi sual tam lo ang.

"Die for you" hi hla thar a ni lo. Kum 2016-a tihchhuah "Starboy" album-a hla pakhat zinga mi kha niin, February 1 khan Ariana chuan 2016 hit kan tharthawh leh dawn tiin social media lamah a lo tlangau pui tawh a, an han tlangzarh ta chiah chu thawm an rawn nei ring nghal hle a, chubakah he hlaa Ariana part sak hi ama phuah a ni nghe nghe.

Karol G-i'n record thar a siam

Mi tam zawkin a hming leh hmel kan la hriat tam lo tak Colombian singer-songwriter, Karol G studio album palina "Manana Sera Bonito" chuan album chart lama SZA "SOS" lallukhum chu a rawn chhuhsak ve bawk a ni.

Karol G hian hmeichhe artist zingah Spanish ṭawng vek awmna album chart chung ber hauh thei hmasa ber record thar a rawn siam a, US bikah kar liam ta khan equivalent unit 94,000 zet a hmuchhuak a, pakhatna a ni.