Lehkhabu bawm; Mizo thu leh hla ziak zirchianna "Negotiating Culture Writings from Mizoram" tlangzarh a ni
"Negotiating Culture Writings from Mizoram" tih lehkhabu chu nimin khan Aijal Club ah Prof. Lalrindiki T.Fanai in a tlangzarh a, he hunah hian Rev Dr Lalchungnunga'n hunserh a hmang a, Dr C.Lalawmpuia Vanchiau in lehkhabu preview na hun a hmang bawk.
Prof. Margaret L.Pachuau chu he lehkhabu editor hi niin, Bloomsbury Publishing kaltlanga tihchhuah a ni.
He lehkhabuah hian mi thiam 14 ten Mizo thu leh hla ziak behchhana nihna(identity) leh hnam zia(culture) an zirchiannate tarlan a ni. Heng thuziakte hian dinhmun hnuaihnunga kan din lai (subaltern) aṭang leh British hoin min awp tawh loh hnu (post-colonial) thlenga hmasawnna kal zel zir chiangin, Mizote ngaihdan behchhanin culture leh identity chungchang an chhui zauna a ni.
He lehkhabuah hian thlirna tlang hrang hrang - ṭawngkaa an dawn te, history leh thuziak aṭanga thlirna te, history aṭang te, memory studies aṭang te, culture lam zirna aṭangtea identity leh culture inher danglam dan chhuina ngaihnawm takin a chuang. Thu leh hla lar zual leh mimal hriatna behchhana ramri mumal taka khamin, Mizote zinga mimal leh a huho nihna pawimawh leh, chhinchhiah tlak laite pho chhuakin an pawimawhnate pawh tarlan a ni.
Mizo intellectual history chhunga hmasawnna leh literature leh culture inlaichinna pawh huam zau zawkin an rawn chhui a. Ṭawngkaa inhlan chhawn (orality) behchhanin British-in min awp lai (colonial) leh min awp hnu (postcolonial) chungchang chik leh fiah tak, huam zau taka chhuina a chuang bawk. He lehkhabuah vek hian awpbeh kan nih laia Mizote helna rilruin awp beh kan nih tawh loh hnu pawha khawtlang lam culture duh lohna leh khawthlang culture kan la lakchhawn dan leh Mizote rilrua zung a kaih dante pawh chhui a ni. A chhuahtu Bloomsbury Publishing hi khawvel pum huapa fiction leh non-fiction chhuahtu lar an ni a. An lehkhabu chhuah zingah J. K. Rowling-i lehkhabu Harry Potter series chu hriat hlawh leh lar tak a ni. A bu hi Amazon leh The Book Café Chanmari ah mipui lei theihin a awm.