One in Christ Ft. Isaac Hnamte Fak hla mawi ri

One in Christ leh Isaac Hnamte thawkdun chuan nimin khan hla thar 'Fak hla mawi ri' an tichhuak a, OiC YouTube channel lamah thlira ngaihthlak theih turin an chhawp chhuak.

OiC leh Isaac-a te hi tute nge an nih sawi nawn a ngai lo a, Mizoram Gospel music scene-ah chuan huhang ngah ber pawl an ni. An hla thar hi Phil Wickham hla 'Song in My Soul' tih Mizo ṭawnga lehlin a ni a, OiC leader Alvin-a lehlin hi a ni nghe nghe.  

"Ṭum danga kan la tih ngai loh leh a hmasa berna turin zaithiam dang kan thawh pui ve a ni," tiin Isaac-a an thawhpui chungchang hi Alvin-a chuan Vanglaini a hrilh. Music video pawh en a nuam a, Isaac-a'n bul rawn ṭanin OiC-a an tenor Zomuani zai ngaihnawm tak ngaihthlak tur a awm bawk, ngaithla chak tan chuan YouTube lama hmeh chhuah mai chi a ni ang.

ASAFA Studio-ah an hla thar hi an record a, music chu Andrew Vanchhawng kut chhuak niin video hi RDS Shots kut chhuak a ni thung. 'Fak hla mawi ri' hi an tihchhuah aṭanga darkar li chhungin mi sing chuangin an thlir nghal a, ngaihthlak a hlawh chhoh viau a rinawm a ni.