Kum 2022-a mihang hmeichhia zinga zawn hlawh ber Zendaya

Spiderman star, Zendaya Coleman chu kum kal ta chhunga Google-a mihang hmeichhia zinga zawn hlawh ber a ni.

Zendaya hian lemchan hmanga a talent chu tipungin, tunah chuan lemchanthiam lawm hlawh ber leh, khawvel huapa mite ngaihven hlawh berah kum rei lote lote chhungin a rawn invawrh der tawh a ni.

Lifestyle website, ThatSister-in data thar ber a tihchhuahah, kum 26 mi hi top 10-a hmeichhe lang dangte lakah a filawr fal hle. Kum 2022 khan Google-ah thlatin chawhrualin mi maktaduai 2.71 velin a nihna leh a chanchin hriat duhin an zawng ziah ṭhin a ni. Zendaya channa "Spider-Man: No Way Home" khan kum 2021-a film lakluh tam lamah parukna dinhmun lai a hauh phak bawk a, Zendaya hi a la naupang bawk nen lemchan huangah a hming la hre ngai lote pawhin kan hre chho zel dawn niin a lang.

Hei bakah, "Euphoria"-a a role a hnehsawh em avangin nomination eng emaw zat hmu tawhin, chawimawina ṭhahnem tak a dawn phah bawk a ni. Kum 2020 khan Primetime Emmy Award hmasa ber a dawn phah nghe nghe a, nikum khan HBO series Rue Bennett avang bawkin Golden Globe Award a lo dawng tawh bawk a ni.

Serena leh mi dangte

Tennis star, Serena Williams chuan August 2022 khan inkhelh a chawlhsan dawn tih a puang a, a tennis career a zawh hunah engtin nge a awm zel dawn tih chu mipui ngaihven niin, pahnihnaah a awm.

Serena-i ṭhian hnai tak, Meghan Markle chu pathumnaah awmin, Netflix lama an nupa chanchin tarlanna "Harry & Meghan" vangin mi ngaihven a rawn hlawh thar zual hle. An nupaa Lal chhungkua an chhuahsan hnuah, thuthar an rawn nei deuh reng a, British Lal chhungkaw chanchin dengkhawng tak takte pawh an rawn phawrchhuak fo a nih kha.

Queen Bey, Beyonce Knowles leh, First Lady hlui Michelle Obama chuan search-tu maktaduai khat chuang awrh neiin palina leh panganaah an awm.

(Thatsister chuan Google search data kaltlangin, January 1,2022 aṭanga kum tawp thlengin Afro-American huhang ngah mi 100 chuang aṭangin zirchianna an kalpui)