Lady Gaga-i'n Oscars a zai tura sawmna a hnar

Lady Gaga, a hming tak Stefani Joanne Angelina Germanotta chuan artist tam takin zai an chakna ṭhin, film leh television lama chawimawina sang Oscars 2023-a zai tura an sawmna chu a hnawl a, a hnawl chhan chu eng dang ni loin "Joker: Folie a Deux" buaipuia hun hman tam zawk a duh vang a ni.

Gaga hi kumina Oscars sem turah hian Best Song category nominee a ni a, film lama insawrbing zawk a duh vanga hnar a nih thu a sawi chu hriatthiamna sang tak nen an pawm tih Oscars showrunner Glenn Weiss chuan a sawi.

"Top Gun: Maverick" film-a Gaga hla sak "Hold My Hand" chuan Best Song nomination a hmu a, kum 2019 khan Bradley Cooper nena an channa "A Star Is Born"-a ama hla sak vék "Shallow" hmangin Best Original Song a lo dawng tawh a ni.

Super Bowl Half time show aṭanga thawm rawn nei lian chho mek, Rihanna chu zai tura tihchian a ni tawh a, March 12 hian Los Angeles-a Dolby Theatre-ah Oscars hi sem a ni ang.