Street food hrisel siamtu BTech Pani Puri Wali-in ngaihven a hlawh

Ṭhalai tam tak chuan sumdawnna bul ṭan tumin an suangtuah ṭhin a, a tam zawk chu an suangtuahna ramah an tawp zui leh mai ṭhin. Eizawnna bul ṭan hun a in ang lo a, kum naupangte aṭanga ṭan a, hlawhtling zui ta em em an awm a, kum upat hnua hlawhtlinna nopui dawm an awm thung.

Chung ṭhalai suangtuahna thui tak nei zingah chuan kum 21 mi, Tapsi Upadhyay pawh a tel ve. Tapsi hian BTech a zawh hnuah Pani Puri hmangin sumdawnna bul a ṭan a, tunah chuan mipui hriat hlawh chho zelin BTech Pani Puri Wali tiha hriat lar a ni tawh.

Tapsi chuan a tum ber chu eitur hrisel tak siam a ni a, a puri te hi thianghlim thei tur ang bera air-fried an nih thu a sawi. An official website lama an tarlan danin, an start-up hmangin khawlaiah eitur hrisel leh thianghlim chhawpchhuah chu an tum ber a ni.

Pani puri aṭanga bul ṭanin street food chi dang tam tak hmun danga kan hmuh aia thianghlim zawk zawrhchhuah kan tum a ni, an ti.

Tunhnaiah Tapsi Instagram reel chu a viral chiam a, hetah hian stall a hawn dan leh, a eitur siam chanchinte a tarlang. Hei bakah hian hmeichhia a nihna anga harsatna a tawh dante sawiin, a graduate hnuah eng vanga pani puri zuar ta mai nge a nih tih zawhna chu a dawn hnem ṭhin thu leh, khawlaiah eitur zuara hmeichhia vah vah a him loh zia mite ka aṭanga vawi tam a dawn tawh thute a sawi a, he clip tawite hi mi nuai 2 chuangin an like tawh a ni.