UPSC Result a chhuak Pradeep Singh pakhatna a ni

Union Public Service Commission (UPSC) Civil Services 2019 result chu nimin khan a chhuak a, Pradeep Singh chu pakhatna niin Jatin Kishore chu pahnihna a ni a,  Pratibha Verma chu pathumna a ni.

India rama hna exam result ngaihven hlawh ber leh pawimawh ber tih hial ngam UPSC Civil Services 2019 result chhuakah hian mi 829 an tling a, pathumna Pratibha Verma hi hmeichhe zinga ti ṭha ber a ni. Politics lama mi langsar eng emaw zat chuan UPSC exam-a tling tharte lawmpuina hi an tar chhuak nghal bawk.

He thu buatsaih lai hian Top 3-te dinhmun hi tarlan chian a la ni lo a, internet lamah pawh eng ang mi nge an nih leh eng nge an 'background' tih tarlanna hmuh tur a la awm lo.Top 25-ah hian mipa 12 leh hmeichhe 12 an awm a ni.

UPSC exam hi khawvela exam har tawp an sawi ṭhin zingah a tel a, exam tlin harsa list media  ṭhenkhatin an tarlan ṭhen­khatah phei chuan exam tlin harsa ber ang hiala sawi te pawh a lo ni tawh ṭhin.

UPSC result chhuaka 26-na hi pakhatna nen an hming a inang a, Pradeep Singh tho niin Bihar lam mi a ni a, Bhopal-ah khawsa mekin a pa chu petrol pump attendant a ni. 

Kan ṭhenawm state Assam-ah chuan an DGP hlui Kuladhar Saikia fapa a tling a, a ni hi 59-na a ni, Assamese tho  Tapan Deka chu 766-na a ni ve bawk. Richard Yanthan, Naga­land-a mi chu 133-na a ni a, Nongjai Mohammad Ali Akram Shah, Manipur (Keikhu Awang Leikai, Kshetrigao AC) chu 188-na a ni ve bawk a ni. Manipur mi tho Parikshit Thoudam chu 373-na a ni a, Tripura mi Dhiman Chakma chu 722 a nih laiin Zenden Lingzerpa, Sikkim mi chu 794-na a ni bawk.