Sushant Singh thihna thubuai Bihar CM-in CBI kuta dah a duh
June 14-a a Mumbai-a a chenna ina boral ta, Sushant Singh Rajput thihna thubuai kal zelah Bihar chief minister Nitish Kumar chuan CBI-in chhui zui mai se a duh thu a sawi.
Nitish Kumar chuan, "A chhungte'n an remtih bawk avangin FIR theluh chungchangah chuan CBI inrawlh mai se ṭhain ka hria," tiin a sawi a ni. Sushant Singh pa KK Singh hian tunhnai khan CBI-in a fapa thihdan chu chhui chiang se a duh thu a lo sawi tawh a, February 25-ah daih tawh khan a fapa nunna chu a derthawng tih Bandra Police-te a hrilh tawh thu leh engmah hmalakna a awm loh thute pawh a lo sawi tawh bawk.
Bollywood superstar thihna thubuai hi a la tawp mai dawn lo niin a lang a, national media lamah phei chuan nitin deuh thawh Sushant Singh thihna kaihhnawih hi chhiar tur a la awm a ni.