Khiangte Construction Ṭhazual Lengzem; A chung berah Hmangaihi "I awm tlat si"

Khiangte Construction Ṭhazual Lengzem chart-ah Mizo Idol Season 7 winner T. Vanlalhmangaihi a chungnung ber a, tunhnaia movie hit leh sawizui hlawh tak "Amawii" film OST "I awm tlat si" hmangin ro a rawn rel.

Zaithiam special Hmangaihi

Hmangaihi hian Mizo Idol nihna phu khawpin a zaithiam tih a lantir tawh a, eng hla pawh sa se, ama mood ang zela min hruailut thei hi a 'special' na lai a ni. "I awm tlat si" hi Amawii film zulzuia phuah niin, he hla phuahtu hi tu dang ni loin - tunlaia lengzem hla phuah thiam ber pawl tiha sawi theih RP-a Ralte kutchhuak a nih avangin a rawn chhuah tirhah beiseina sang tak nena thlir a ni nghal a, chu beiseina sang tak chu a rawn hlen chho zel a tih theih a ni.

Polysphere leh Saka tan hun ṭha

Mizorama rock contest lian ber, SEKI Inter-Village Band Contest 2022-a pahnihna, Polysphere pawhin intihsiakna an hmachhawn laia an thothang ṭha tak kha an la hloh loh zia chu an music video thar "Siar" hmangin an rawn lantir a, chart thar berah hian pahnihnaah an rawn invawrh chho tawh a ni.

Mizo Idol Season 7-a Top 10 zinga mi, Saka chuan thla hmasa khan a music video hmasa ber "Thumal pathum" chu tichhuakin, a tihchhuah aṭanga hun tam a liam hmain chart ler lam a rawn luahlum ta der a, Polysphere nen hian pakhatna ni thei turin dinhmun ṭha takah an ding mek.

Chart a lang dangte chu...

Hla phuah lama kan mi bik pahnih, John Mawitea & Mapuii Fanai hla phuah; Marina Hriatpuii'n thiam taka a sak "Chhingmitthla' chuan pen khata hma rawn sawnin, palinaah a awm. David Darlong-a'n "Lenghermawi" hmanga chart topper a luah hnuah, a music video thar "Lungdum" chu top 5 huangah a rawn zuang lut leh ta der mai a, pakhatna a thlenpui leh a nih pawhin thil mak a ni lo ang.

Anni bakah hian, Vanzara, Mercy Remsangmuani, Sabina Somi, HT Lalthanzami leh Ngurthansanga-te chu chart a lang dangte an ni.