India tan zan chhinchhiahtlak : Naatu Naatu leh The Elephant Whisperers te'n chawimawina nopui an dawm "Everything Everywhere All at Once" a langsar ber

Film lama chawimawina sang ber tiha an sawi ṭhin, 95th Academy Awards, Oscars tiha sawi bawk chu nimin zing khan Los Angeles-ah semchhuah a ni ta a, India ram aṭanga nomination hmu pathum zinga pahnih "Naatu Naatu" leh "The Elephant Whisperers"-te chuan chawimawina nopui an dawm haw a, India tan zan chhinchhiah tlak tak a thleng.

Hei bakah hian, Malaysian actress Michelle Yeoh chu Asian hmeichhe zingah best actress dawng thei hmasa ber niin, Hollywood-a kum tam a bikbo hnuah Brendan Fraser chuan "The Whale" performance vangin best actor chawimawina a dawng a, ropui takin lemchan khawvelah a hming a rawn tuai nung thar leh bawk a ni.

India tan zan chhinchhiahtlak

RRR blockbuster track "Naatu Naatu" chuan khawvel huapa artist ṭha pahnih Lady Gaga leh Rihanna meuh khumin Best Original Song chawimawina a dawng thei tlat! Sawi nep theih a ni lo.

RRR hi Indian film zinga senso hautak ber niin, "Naatu Naatu" hla bik phei hi chu lamthiam rual mi 150 leh thawktu mi 200 chuangte'n ni 15 chhungin; nitin darkar 12 shoot nan hun an hmang a, an thawhrim rah an seng ti ila kan sawisual lo ang.

He hlaa tempo leh choreography hmuhnawm tak hi khawvel mit fukna a ni mek a, award sem zana an performance pawhin lawm a hlawh lehpek hle.

Hei mai a la ni lo, "The Elephant Whisperers" chuan Best Documentary Short film category la in, nupa pakhatin sai note a chhungte lak aṭanga lakhran an enkawl chhoh dan tarlanna; mihringte leh ran inkara inzawmna thuk tak an neih dan chanchin ngaihnawm tak hian he category bika Indian production film award dawng hmasa ber nihna a rawn hauh bawk a ni.

'Everything Everywhere All At Once' sawi ang

Oscars-ah film malkhaia langsar ber erawh chu Best Actress dawngtu - Michelle Yeoh channa 'Everything Everywhere All At Once' hi a ni. He film hian nomination 11 zet hmuin, award pasarih a hum haw. He film-a a changtu dang Ke Huy Quan leh, Jamie Lee Curtis-te chuan Best Supporting Actor bakah Best Supporting Actress lawmman an dawng bawk.

Tarzan kan la theihnghilh lo

Kum 10 chuang zet phumbo a nih hnuah The Mummy leh Tarzan film aṭangtea kan hriat lar, Brendan Fraser chu "The Whale" performance vangin kaihthawh niin best actor chawimawina a dawng. Chawimawina sang a dawn theih chhan a hai lo a, role pawimawh chang tura thlangtu director hnenah hahipin lawmthu a sawi zui.

Chawimawina dawngtu langsarzualte 

Best Picture: "Everything Everywhere All at Once"

Best Director: Daniel Kwan and Daniel Scheinert – "Everything Everywhere All at Once"

Best Actor: Brendan Fraser - "The Whale"

Best Actress: Michelle Yeoh - "Everything Everywhere All at Once"

Best Supporting Actor: Ke Huy Quan – "Everything Everywhere All at Once"

Best Supporting Actress: Jamie Lee Curtis – "Everything Everywhere All at Once"

Best Original Screenplay: "Everything Everywhere All at Once" – Daniel Kwan and Daniel Scheinert

Best Animated Feature Film: "Guillermo del Toro's Pinocchio"

Best International Feature Film: "All Quiet on the Western Front" (Germany)

Best Documentary Feature: "Navalny"

Best Documentary Short Subject: "The Elephant Whisperers"

Best Original Score: "All Quiet on the Western Front"

Best Original Song: "Naatu Naatu" from "RRR"

Best Sound: "Top Gun: Maverick"

Best Production Design: "All Quiet on the Western Front"

Best Cinematography: "All Quiet on the Western Front"

Best Costume Design: "Black Panther: Wakanda Forever"

Best Film Editing: "Everything Everywhere All at Once"

Best Visual Effects: "Avatar: The Way of Water"