'Scream VI' a ṭé ring ber
American slasher film hlawhtling ber zinga mi tiha sawi ngam, 'Scream VI' chu kar liam ta chhung khan USD maktaduai 44.5 lalutin, Box office-ah ani aia ṭe ring an awm lo.
'Scream VI' hi 'Scream' (2022) chhunzawmna leh, Scream film series parukna a ni a, kum hmasa lama role pawimawh latu Melissa Barrera, Jasmin Savoy Brown, Mason Gooding, Jenna Ortega, Hayden Panettiere, leh Courteney Cox-te chu he film khai dingtu pawimawh an ni a, anni bakah hian hmel thar eng emaw zat an inlan bawk.
Ghostface thar kan hmu
Fictional character zinga lar leh troll hlawh berte zinga mi, Scream franchise hlawhtlinna thuruk tiha an sawi hial Ghostface thar hmuh theihin a awm a, a nihna chiang zawka hre duh tan he film hi hmaih phal chi a ni lo a, a che turu lehpek hle tih chin bak sawizui tam lo ang. Ghostface hi franchise hmasa lama a lo chettlatna Woodsboro khua chhuahsanin mipui tamna New York khawpui lamah a inhrosa lai hmuh theihin a awm bawk a ni.
Hei bakah 'Scream VI' hi Scream franchise zingah tlangzarh kara sum thawkchhuak hnem ber a ni a, theatre 3,670-ah pekchhuah niin, USD mtd 35-40 inkar lalut tura rin ni mah se, an rinna hi a rawn khum chiang hle. Rampawn theatre aṭangin USD mtd 22.5 lalut bawkin, a sum lakluh belhkhawm hi USD mtd 67.1 lai a tling chho tawh a ni.
Creed III hnek tlak a ni
'Scream VI' el phak turin 'Creed III' tha a fei tawk tawh lo a, pahnihnaah a tla thla. Heti chung hian USD mtd 27.2 vel zet a la thawkchhuak theih tho avangin ni 10 chhung lekin USD mtd 100 chuang a lalut tling tawh thung a, Michael B Jordan channa hi a che chhe zawk zawk lo e.
"A Quiet Place" writer Scott Beck leh Bryan Woods ziah, Adam Driver channa sci-fi pic '65' film thar chuan USD mtd 12.3 lalutin pathumnaah a awm. "Ant-Man and the Wasp: Quantumania" chu a rawn chhuah tirh phat aṭangin critics te'n a thawnthu kalhmang an duhkhawp lohzia an tlangaupui chiam a, hei vang hian entu pawh a kartelin an tlahniam chak hle a, palinaah tlathlain khawvel pumah USD mtd 250 lai chu a la hailut phak ta tho a ni.