Delhi Metro-ah Insta Reels leh Dance video siam khap : "Zin la, harsatna thlentu ni suh"

Delhi Metro Rail Corporation (DMRC) chuan tunhnai chhoa metro chhehvelah leh rel chuan laia ṭhalaite'n Insta Reels leh dance video an siam ṭhin chu ngaimawhin, midangte tan harsatna siamtu lian tak a la nih zel theih avangin video siam khap dan thar a tichhuak.

Heng video-te hi ṭhalai lawm leh en hlawh viau ṭhin mah se, a chuang ve dangte tan ninawm leh mit tikhawmtu mai an nih theih avangin content creator-te chu heng lakah hian inveng turin a chah bawk a ni.

DMRC chuan hun hmasa lamah pawh passenger-te chu metro coach-ah video siam tawh lo turin ngenna an tichhuak fo a, mahse rah ṭha a chhuah thei ṭhin lo a ni. Delhi Metro chuan, "Zin la, harsatna thlentu ni suh," tih leh, "Delhi Metro-ah hian passenger ni la, chimawm suh ang che," tiin Twiiter-ah an ziak.

DMRC thuchhuah hian ngaihdan a tiphir hle a, ṭhalai zinga tla na tak khap a ni mai hi sawisel tawk an awm a, mimal zalenna inrahbehsakna tih tein an sawi. Ṭhenkhat erawhin like hmuh duh avanga vantlang hmunah mit ti kham zawnga an chetla kan hmu tawh lo tur hi a lawmawm hle tiin, public transport zawng zawngah kengkawh vek rawh se tih te in an sawi thung.

DMRC hian February thla khan, Oscar-winning song 'Naatu Naatu' hla thu lachhuakin, "Lam hi nuam mah se, Delhi Metro hi lamna hmun tur a ni lo," tiin thuchhuah an lo siam tawh a ni.