Selena Gomez drama kalzelah Justin leh Hailey inkar chhiat phah lo

Justin Bieber leh a nupui Hailey Bieber-te chuan an nupa inkarah drama dang thlentir an remtih loh thu an sawi.

Report thar berin a tarlan danin, Canadian pop superstar leh Hailey-te hian Selena Gomez vanga inhmuhthiam lohna thleng mekah thuchhuah engmah siam lo turin thutlukna an siam fel tawh niin an tarlang.

Hailey leh Kylie Jenner te'n social media lama Selena diriam zawnga post an siam hnuah, IG-a hmeichhe follower ngah ber fan, Selenator-te chu ngawih mai an tum lo a, an idol Selena an thawp zia an lantir piah lamah an pahnih sawiselna leh troll hmuh tur ṭhahnem tak hmuh theihin a awm bawk a ni.

Mahse, Justin-te nupa chuan Internet-a thuthang chu an nupa inkar tichhetuah hman an tum loh thu leh, ṭha taka an khawsak zui zel thu an sawi a, "Inngaihzawnna thi tawh thuthang vanga a ngaia kual reng hi an peih tawh lo a ni," tiin Entertainment Tonight chuan a tarlang.

"A ni telin an inkara harsatna awm te an chingfel zel a, a chhe zawnga innghawngtir an tum lo. Justin hian vantlang hriata a sawichhuah chuan buaina hi a punlun thei a, mi pawhin an ngaihven zual sawt theih avangin a rukin an inṭanpui tawn a ni," a ti.

Hetih lai hian, Selena erawh a burna ngaiah hna a thawk mek a, a hmabak ang angte chu a buaipui ve mek bawk a, a hriselna leh fans-te thu chu ngaihpawimawh hmasakah a nei. Selena hian therapy a kal mek a, a chhungte leh ṭhiante kiangah hun a hmang tamin, a ṭhianṭha zualte kiangah hun a hmang niin report chuan a tarlang.

Hailey leh Selena-te hi Justin nen inzawmna an lo neih ve ve tawh avangin an inkar hian ngaihven pawh a hlawh phah zual hle a ni. "Only Murders in the Building" star hian kum 10 dawn chu Justin hi on-off relationship a lo neipui tawh a, Justin-a'n kum 2018-a Hailey a propose hnuah erawh an pahnih inkar hi a tawpfel tawh a ni. Hei hi Selena-i fans tam tak chuan pawm thei loin, an inngaihzawn phat aṭangin Hailey hian hawtu leh diriamna pawh a tawn phah nasa hle a ni.