Thubuai chinfel a nih hnuah IG-ah Megan a rawn kir; Album pathumna tur a buaipui mek

American rapper, Megan Thee Stallion chu silaia kahna thubuai, Tory Lanez shooting trial chu chinfel a nih hnuah social media-ah a hmel kan hmu leh ta.

Canadian rapper, Tory Lanez chuan December 2020 khan Hollywood Party-ah Megan nen an inhnialbuai hnuah a keah a kap hliam a, heng hunlai hian hip-hop khawvel ngaihven rawn a ni.

Los Angeles court-in thubuai a ngaihtuah hnuah, Tory Lanez chu thiam loh chantirin kum 22 leh thla riat chhung lung inah tang turin a hrem zui a ni.

Heng an thubuai neihte avanga thla thum chuang zet a bikbo hnuah, Megan chuan Vanity Fair Oscar afterparty-a a thlalakte chu IG-ah a rawn pholang leh ṭan.

Kum 28 mi rap star hian August 2022-a a studio album pahnihna "Traumazine" a tihchhuah hnuah a album pathumna tur a buaipui mek tih a sawi. Megan hian tunhnaiah hlawhtlinna hrang hrang a chang chho mawlh mawlh a, rimawi kaltlangin thawnthu tam tak puan chhuah zel a tum thute a sawi. "Chawlh tumna ka la nei lo. Ka thih hunah chauh ka chawl ang. Thil lian tham tak hlenchhuah ka tum vang a ni. Hetia ka ṭhut mai mai hian, ṭha intih tawk lohna ka nei emaw midang tan inlehpelhna hun ṭha ka siamsak emawah ka ngai a ni," tiin a thiltihna apiangah theihtawp chhuah zel a tum thu a sawi.