Zaninah 'Black Rose' tlangzarh a ni dawn ta

Mizo romantic/comedy film thawm nei lian leh, ṭhalaite nghahhlelh Black Rose chu zanin dar 8 hian Vanapa Hall-ah tlangzarh a ni dawn ta.

Zanin hian kan Mizo milarte pawh an fuan kim hle tura ngaih a ni a, kan artist neih ṭhat heng - Vanlalhmangaiha, Zirtluangpuii, Youngfella, Smiley leh Travis-te'n kalkhawmte an awi dawn a, ticket hi seat 300 bawr chauh siam a nih avangin lak hma a ṭha awm e. Black Rose hi March 21 zanah, Lunglei helipad-ah premiere a ni leh dawn a, chuta ṭang chuan hmun hrang hrang ah show neih kual nghal a ni ang. March 24 zanah Serchhip Auditorium-ah 'actor tour' neih chhunzawm a ni bawk ang.

Ticket hi Kristie House of Beauty (Avon), Zarkawt leh Fonn Inn, Dawrpui Mahatma Gandhi lim bulah te lei theihin a awm a ni.

Thawnthu kalhmang

Black Rose hi Mizo thawnthu kalphung, tunlai kan nun leh changkanna mil taka kalpui a ni a, Love Story lam hawi; mittui ko chhuak thei a ni. Hmangaihnain beisei loh dana a pawh her dan, changtunu khawvel buaichuar tak chuan he film hi a thunun a ni. Mizo mipa model kan neih ṭhat ber te zinga pahnih Timothy Vangchhia leh Mazualtea te'n role pawimawh an rawn la dawn a, a changtunu role ah hian Mizo film industry lama mi thar; Kawnpui nula, Nunui kan hmu dawn a, changtute hian an role an hneh hle a, he film hi a faiin hmuh a nuam dawn hle a ni.